طمينة كيما يحب الخاطر حلويات من المطبخ الجزائري

عنوان الموضوع : طمينة كيما يحب الخاطر حلويات من المطبخ الجزائري
كاتب الموضوع : مريم
مقدم من طرف منتديات ايمازيغن

السلام عليكم
حبيت نشاركم بطريقة تحضيري للطمينة حطيتها في //مادا ستطبخين سيدتي//بصح بعض الاخوات طلبو مني نحطها موضوع خديت برايهم المهم كاين بزاف طرق لتحضير الطمينة في الشرق نوع والغرب نوع والوسط نوع حتى في الصحرى بلاك عندهم طريقة المهم احنا في دارنا نحضروها بالشكل الاتي
جيبي سميد وسطي ماهوش حرش بزاف ماهو رطب بزاف عينك هي ميزانك اول حاجة نفوروه عادي في الكسكاس ما تكثريش فوري بلعقل //هادي الحكمة //ولازم ديري كومبغاس ولا مورصو فينة المهم حاجة رقيقة باش ما يطيحش السميد من لعوينات تاع الكسكاس منبعد حطيه في قصعة حليه شوية وخليه يبرد منبعد حمصيه عادي بالشوية على نار قليلة وفي مقلة تكون ثقيلة وكي تفوريه يتسمى يكون طاب شوية ميجيكش يتغزغز وكي نحمصوه نعطيولو لون ما نحمروهش بزاف منبعد نوجدو العسل وندوبو فيه الزبدة ولازم يكون السميد برد بعدما نحمصوه باش ما تطراش الطمينة ونسقيوها على حساب ما تحبي كاين لي يحبها جارية وكاين لي يحبها ناشفة شوية ونديرو حلوة الترك ولا كاوكاو وسورتو القرفة ديكور وكاين لي يزيد حلوة الترك للسميد قبل ما يعسلو المهم هاداك الشيء انتي والدوق نتاعك وشهية طيبة للجميع وهامليك الصور
http://upload.4algeria.com/do.php?img=34718http://upload.4algeria.com/do.php?img=34719http://upload.4algeria.com/do.php?img=34720http://upload.4algeria.com/do.php?img=34722




©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©