عنوان الموضوع : .*. طفلك تمّ سنة؟ ياكل كل حاجة؟ لأ إستني تعالي هنا .*.- لرعاية طفلك
كاتب الموضوع : chahinez
مقدم من طرف منتديات ايمازيغن

عاوزة أتكلم في موضوع لا يقل أهمية وهو (أكل الطفل بعد السنة)
لأن بعض الأمهات بتتصور إن الطفل طالما وصل سنة يبقى هياكل أي حاجة وكل حاجة
لأ طبعا الأمر مش كدة, والطفل لازال طفل وفي ممنوع ومسموح
أولا بالعقل كدة: الطفل بعد ماكان بياكل مسلوق ومشوي وكل أكله بدون سكر ولا ملح ولا عسل
هل معقول إني ممكن أأكله طبيخ متسبك وأكلات مقلية وأحليله ببسبوسة بالقشطة؟؟؟
طبعا لا يمكن ... المعدة هيحصلها صدمة والطفل هيتعب
يبقى الصح إن الطفل لما يوصل سنة أبدأ أأكله من أكلي العادي لكن بالتدريج
يعني الطبيخ مايكونش متسبك ومش عليه توابل ودهون كتير ولا ملح كتير (ودة طبعا حاجة مفيدة للكبار كمان) ووقت الأكل ممكن أزود ملح لنفسي ولباباه.
الحلويات بردو بلاش الحلويات الشرقية اللي سكرها ودهونها كتير, لأ ياكل كيك مثلا بسبوسة شرباتها قليل ومكوناتها خفيفة
يعني عموما الأكل والعصاير يكون عليه ملح أوسكر أودهون لكن بكميات قليلة وبالتدريج.
وأكيد معروف إنه أصلا الملح والسكر والدقيق بيسموهم السموم البيضاء, فاستخدامهم بقلة دي حاجة صحية ومفيدة.

ثانيا: في حاجات لسة ممنوعة عن الطفل حتى لو عمره سنة زي:
الشيبسي بأنواعه والبسكوتات والكيكات والعصاير والمشروبات الغازية وما شابه من المأكولات المُصنّعة,
لأنه بعضها فيه مواد حافظة وانتوا طبعا عارفين أضرارها, وبعضها فيه زيوت نباتية مهدرجة ودي مضرة جدا, وبعضها طريقة تصنيعه أصلا بتسبب أمراض, وبعضها مكوناته نفسها مش مضمونة نهائيا.
هتقولولي ليه التعقيد بس هو كل حاجة غلط غلط ومضرة !!!
ببساطة اكتبوا على جوجل أضرار البيبسي, أو أضرار الشيبسي أو أضرار المواد الحافظة واقروا وانتوا تعرفوا.
وكمان هي كل الأكلات والمشروبات اللي خلقها ربنا خلصت ومش فاضل غير شوية الحاجات دي اللي هنديها للطفل
ربنا خلقلنا كام نوع فاكهة وكام نوع خضار وغيره وغيره
الأكل اللي ممكن ناكله كتير والحلويات اللي ممكن نعملها كتير والمشروبات كتير, خلينا في الأفيد والأضمن والأأمن لأطفالنا
علشان يكبروا بمناعة قوية وصحة كويسة تدوم معاهم العمر ويدعولنا بعد كدة, مش العكس بعد الشر.
أنا ممكن أجيبلكم دراسات وتفاصيل لكن أنا مش حابة الموضوع يكون طويل.

ثالثا: مش علشان الطفل وصل لعمر سنة يبقى المفروض ياكل ضعف الكمية اللي كان بياكلها قبل كدة
بالعكس. الطبيعي إن الطفل بعد سنة أكله بيقل وجسمه بيقل كمان وبيطول بس.
فانتي تركزي إنك تجمعيله كل العناصر الغذائية في أكله وتنوعيله فيه
زي (كالسيوم, حديد, بروتين, سكريات, دهون ...........)
بعض الأطعمة الغنية بالكالسيوم: اللبن, الزبادي, السردين, السالمون, الكرنب)
بعض الأطعمة الغنية بالحديد : الكبدة, اللحم الأحمر, الملوخية, التفاح, العدس)
بعض الأطعمة الغنية بالبروتين: اللحوم الحمراء والبيضاء, البيض, الفاصوليا)
والصح إن الطفل ياكل الوجبات التلاتة الأساسية مع الأسرة ومعاهم وجبتين خفاف وجبة بعد الفطار ووجبة بعد الغدا
وبعد ماخلصنا احب اقول انو منقول لانى حبيت انى اخليكو تستفيوا


قد تكوني مهتمة بالمواضيع التالية ايضاً:





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©