عنوان الموضوع : رمضان كريم - مطبخ الجزائر
كاتب الموضوع : hamida
مقدم من طرف منتديات ايمازيغن

السلام عليكم يا احلى اخوات في احلى منتدى بما انو شهر التوبة والغفران ما بقالوش الا 13 يوم راني حابة كل اخت تقولينا واش هي الاطباق الي ديروها اليوم الاول من رمضان؟؟؟ او واش يديرو للطفل الي يصوم لاول مرة كل واحد عاداتو وتقاليدو وكل واحدة تحكينا لما صامت اول مرة كيفاش صرالها
نبدا نحكيلكم انا لما صمت اول مرة او ما صمتش حتى للسنة الخامسة تخيلوها مرا اوناكل بزاف ما نخلي والو في الفريجيدارالنهار الاول من رمضان 1995 قلت لازم نصوم كبرت ولا نهار صمتو في حياتي بداو خاوتي يضحكو عليا يقولولي انت تصومي!!!!!!!! هداك النهار الاول كنت جايبتها جايبتها حتى للادان انا درت الحبة نتاع التمر في فمي ما جيت نوصل الكاس نتاع الحليب حتى تغاشيت ما نضتش حتي داوني للسبيطار و دارولي السيروم باش فطنت يايما يايما على هداك النهار واعر بزاف رغم انو كنا في الشتا ضرك حالفة بلي نعلم اولادي يصومو وهما صغار مشي كيما انا
بالنسبة للاطباق الي نديروهم اليوم الاول سيدة المائدة في رمضان الى وهي الحريرة وما ننساوهاش طيلة 30يوم والمعجنات السوفلي البوراك وغيرهم جلبانة بالحم +لحم حلو بالاضافة الى سلاطة وما ننساش العصائرالي نركزو عليهم بزاف في هدا الصيف
اما بالنسبة للطفل الي يصوم اول مرة اولاد خاوتي نلبسوهم لبسة نتاع ختانة والبنت نلبسوها التقليدي بالمثل نخيطولها قسنطينية او كراكو والكبير في الدار هو الي يوكلهم التمر مع الحليب يفطرهم على يدو من ثم يفطرو معانا عادي بعد دلك يروحو للتراويح كي يجو يصيبونا وجدنالهم لاتاي مع القلب الوز والزلابية ......... وغيرها من الحلويات يفوت نهار شباب بزاااف
ياالله يا لبنات ايا كل واحدة تحكيلنا تقاليدهم وعاداتكم
ارجو التفاعل مع الموضوع واللهم بلغنا رمضان بالصحة والعافية ورمضان كريم للجميع نتمنى نصوموه بالصحة والهنا
وارجوكم تدعو لماما يشافيها ربي وتصوم رمضان
اتمنى ينال الموضوع اعجابكم



©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©