عنوان الموضوع : بالله عليكم تساعدونى فى تفسير احلامى ...انا محتاجه لمساعدتكم ...- تفسير الأحلام
كاتب الموضوع : chichaki
مقدم من طرف منتديات ايمازيغن

السلام عليكم ورحمه الله وبركاته ..

انا عضوه جديده معاكم وارجوكم تفيدونى ...

انا ليا احلام كتيره اعتقد ان كلها لموضوع واحد بس انا محتاره ومش عارفه ايه الصح ..

اتمنى ان يتسع صدركم لى ...لانى بحاجه للمساعده ...

كنت صليت استخاره فى شخص هو كان لسه هيتقدملى بس مجرد انه صرح باعجابه وقالى لازم نصلى الاول ونستخير ربنا لو خير ان شاء الله هيتقدملى خلال شهرين على مايخلص امتيازه



المهم انى صليت وحلمت باحلام كتيره خلال 3 او 4 ايام

الحلم الاول : واحده صاحبتى اسمها ساره بتدينى شنطه صغيره عليها فوينكه وبتقولى دى ليكى عقبالك ..البنت دى كانت لس متجوزه قبلها ب 5 شهور

الحلم التانى : حلمت بالشخص ده الى بستخير فيه انه بيقول ( خلاص يا جماعه انا كتبت كتابى عليها ) وكان يقصدنى انا بس وانتهى الحلم على كده

الحلم التالت : انى بقول لزمايلى فى الكليه انى اتخطبت للشخص ده

دى الاحلام الى حلمتها فى الاول وكنت مرتاحه للشخص ده جدااا وهو كمان صلى بس ماحلمش ولكن ارتاحلى اوى وكنا متفقين فى كل شىئ

وفعلا عدى الشهرين واتصل واتقدم والاهلين وافقوا واتفقوا على كل شىئ على الرغم من حدوث بعض الاعتراضات لدى اهله لكن الموضوع عدى واتفقنا بعد الخلاف ورجعت بعدها صليت استخاره تانى حلمت باهله عندنا فى البيت ودخلوا السفره وهياكلوا معانا االاكل الى كنا المفروض مجهزينه وباباه بيقسم رغيف عيش وهياكل وحلمت انى بجهز اللبس للمقابله ...فقولت يبقى خير ان شاء الله

بس حصل ان قبل يوم قرايه الفاتحه بيوم ناس الله يسامحمهم وصلوا كلام وحش ووقفوا نفسه من الموضوع وهو كان متردد ولقى انه يتراجع بعد كل ده على الرغم من انه كان مرتاح جداااوبيحبنى اوى بس سبحان الله ..





الموضوع انتهى وبعدها رضيت بالنصيب مع الاحساس بالظلم لكنى بدأت اتقرب الى الله اكتر وحسيت ان ده ممكن عدم توفيق من الله لغضبه عليا مثلا ..

الموضوع خلص بقاله شهر وانا خلال الشهر ده كنت مواظبه جدااا على الصلاه وعلى قيام الليل وعلى قراه سوره البقره كل يوم وبدأت احلم احلام تانيه بخصوص الموضوع ده بس من دون استخاره وكل احلامى تكون بعد قيام الليل وقراءه ماتيسر من القران الكريم

حلمت فى مره ان الشخص ده راكب فى عربيه فى الكرسي الخلفى وانا شوفته معدى قدامى ....ومره تانيه حلمت انه طالع معايا رحله فى باص واحد وجيت اشوف مكانه لقيت المكان عباره عن مصليه على ارض الباص ....ومره حلمت انه بيكلمنى وانا بعاتبه وبقوله ازاى ابقى مراتك وماتثقش فى كلامى وتصدق كلام الناس ... وحلم تانى انه جالس امامى وبيسالنى عن حالى فى الفتره الى سابنى فيها من باب انه بيطمن اذا كنت كلمت او اتخطبت لحد غيره او لا وانا كنت فرحانه وبحاول اراضيه عشان يعدى الموضوع ويرجع وزى مايكون خلاص هيرجعلى بس بيطمن ......واخر حلم بقى من يومين انه كان واقف عند محل ورايا وانا بشترى حاجات وراح اتريق على كلامى بقصد انه يستفزنى انا ساعتها زعلت وماردتش ولقيته بعدها بيقول (ايه ده هيا مشيت ياريتنى كنت قولتلها انى لسه بحبها وكان وشه باينلى فى الحلم انه مضايق انه ماكلمنيش )

وفى نفس الفتره دى والدتى حلمت انا كانت واقفه فى البلكونه بس بلكونه دور اول او ارضى على العلم من اننا فى الدور الاخير (6) ووالدة الشخص ده معديه وبتشاور لامى انها داخله العماره وطالعلنا وكانت بنضحك لامى


انا مش عارفه والله ايه التفسير فى الاحلام دى ...ارجوكم بالله, عليكم حد يفيدنى انا فعلا مش عارفه افسر احلامى ولا عارفه افهم اى شىء هل احلامى مجرد اضغاث احلام ام لها تفسير ...وهل هذا خير لى واصبر عسى الله ان يهديه ويكون لي فى نصيب ربما بعد حين ؟؟ ام انسى ولا اعلق امالى على شىء ؟؟


بالله عليكم يا اخوتى تساعدونى ..

قد تكوني مهتمة بالمواضيع التالية ايضاً:





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©