عنوان الموضوع : كيش من كوزينتي مرحبا بكم ممممممم - طبق جزائري
كاتب الموضوع : مريم
مقدم من طرف منتديات ايمازيغن

سلام حبوباتي الغاليات البارح درت للعشاء كيش بالخضر روعة وحبيت تشاركوني يالغاليات نخليكم مع الصور والشرح:


حبوباتي وجدو لابات بغيزي تاعكم وهي على طريقتي وتهبل وخفيفة موت: 300 غ فرينة+ 150 غ مارغارين باردة ومقطعة طراف+ رشة ملح+ رشة فلفل أسود+ بيضة كامل + رشة خميرة القاطو هي الي رايحة تخليها خفيفة روعة ولميها بالماء لازم ماتجيش جارية وماتجيش يابسة وماتعجنيش لمي برك وكوريها وحطيها في الثلاجة مدة نصف ساعة وحليها على المول الخاص بليكيش وأثقبيها وحطي عليها بابييي ألومنيوم وعليه اللوبيا باه ما تتنفخش وطيبيها على بياض أي حتان يوليو لحواشي صوفر ومبعد نحيلها الللوبيا والبابيي ورديها طيب حتان تصفار في الوسط وأنتي تكوني في هذه الأثناء توجدي في الحشو التالي:


في مقلة أقلي الجريوات ( قورجات) مرابية مع شوي ملح نحيها وزيدي حبة بطاطة مرابية ثاني أقليها في شوي زيت ثم أقلي كذلك حبة طمطومة متوسطة وملحيها كذلك و 200غ لحم مرحي مع بصلة متوسطة وشوي معدنوس أقليهم مليح حتان يتشربو من الماء تاعهم ووجدي فرماج شيدر مربي تقريبا 150 غ والي يحبو يكثر وزيتون أخضر مغلي ومقطع وفرماج الذايب و2 بيضات كي توجديهم خلطي الجريوات والبطاطا واللحم ونص كمية الفرماج شيدر والفرماج الذايب الكمية أكل خلطي مليح وحطيها على الكيش تاعك وسوي الوجه وماتضغطيش

وخلي البيضات بجهة مع الطماطم ونصف كمية الجبن المبشور وبعدها حطي كمية الجبن الي بقات على وجه الكيش وخلطي البيضات مع الطماطم ولوحيهم على الوجه وسوي مليح وماتضغطيش ثم رديها للفرن حتان تحمار مليح ويطيبو البيض وكي تشوفي الكيش تاعك ما يخرجوش السوائل من لحواشي أعرفي بلي طابت ونحيها وخليها تدفى ثم قصيها وشهية طيبة نشالله نكون وفيت وكفيت حبوباتي وراني في الخدمة اي استفسار راني هنا على راسي وشكرا لكن



:1 9:



©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©