عنوان الموضوع : كريبوني اصنعيه في دارك - مطبخ جزائري
كاتب الموضوع : مريم
مقدم من طرف منتديات ايمازيغن



دائما في مجال الايس كريم و المثلجات
سبق و درت موضوع la buche glacée
هاذا الرابط تاعة
http://imazighen.univanet.com/showthread.php?t=1374800
ووعدتك بمفاجأة و هي
الكريبوني
شكون منكم ما تحبش الكريبوني او ما تحبش تصنع الكريبوني في دارها
انا اليوم جبتلك وصفة تقدرو تحضروها بطريقتين و النتيجة نفسها
بلا ما نطول نخليكم مع المقادير تاع الطريقة الاولى
2كيسان ماء
كاس سكر
4حبات ليمون متوسطين
100 غ بودرة الشونتيي
2بياض بيض و 2مغارف سكر
ديري الماء مع السكر فوق النار حتى يذوب السكر فقط ماتخليهش يغلي بالزاف غير حساب ما يذوب هاذاك السكر
دخليه للثلاجة لازم يبرد مليح
كي يبرد زيدي عليه عصير الليمون و البودرة تاع الشونتيي و طلعي بالباتور ماشي شرط تتحصلي على كريمة ثقيلة بالزاف
من جهة أخرى تكوني طلعتي بياض البيض مع قرصة ملح و 2مغارف سكر
خلطي الكريمة تاع الليمون مع خليط بياض البيض بملعقة من الاسفل الى الاعلى
ديريه في علبة و دخليه للمجمد
و خليه على الاقل 4 ساعات و رايحا تتحصلي على الذ و احلى كريبوني من يديك




اما الطريقة الثانية هي انك تعوضي الماء و السكر و عصير الليمون بشاربات ذوق ليمون و تتبعي نفس الطريقة الاولى
انا استعملت الشاربات الي موجودة في الصورة




و رايحا تتحصلي على نفس النتيجة

و تقدري تاني ديري الكريبوني تاعك في الكاس و تزيدي عليه الشاربات باش تتحصلي على باناشي منعش امممممممممممممممممممم

اسفة لأني ما درتش طريقة التحضير بالصور على خاطر درته في الليل و الصور ما جاتش واضحة
انشاء الله تعجبكم الوصفة و طبقوها

ملاحظة
الخليط تاع الكريبوني كي ديروه في المجمد رايحين تلاحظو انفصال بين السائل و الكريمة انا نخليه هاك على خاطر تعجبني هاذيك الطبقة السفلى كي تتجمد وعند التقديم نخلط شوية و نقدم
و باش تتفاداو هاذاك الانفصال
تقدرو تخرجوه كل نصف ساعة و تعاودو تخلطوه بالملعقة فقط و ترجعوه
ديرو هاذ العملية مرتين او ثلاثة حتى يتجمد الخليط
لان السر تاع الكريبوني في الخفة تاع الكريمة
وكي جربت و درت الكريمة اثقل ما خرجليش مليح كيما هاذا
 انشاء الله تكونو فهمتوني





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©