عنوان الموضوع : صبيعات العروسة ساهلة واقتصادية جدا ومليحة مع القهوة - قاطوات الجزائر
كاتب الموضوع : kouka
مقدم من طرف منتديات ايمازيغن

السلام عليكم اخواتي
عندي مدة مللي درت هادي الحلوة وصورتها ممبعد ترددت قلت ماتستاهلش نديرها موضوع ساهلة وعادية ممبعد قلت بالاك كاين اللي مايعرفهاش ويحب الحلويات الناشفة سيرتو لكل يوم
المقادير مافيهاش بزاف
4 حبات بيض
-كاس سكر عادي
كاس غير ربع زيت
كاس حليب
مبشور القارص او البرتقال اللي عندك في الدار ولافاني
2 خميرة كيميائية
الفرينة حتى تتلم العجينة مايابسة ماطرية تقعد شوية تلصق في اليد
وللتزين سكر احرش
نحط البيض والسكر نحكهم مليح مع بعض ونزيدو الزيت والحليب نخلطهم مع بعض وممبعد ندير الفرينة والخميرة ونلمها ، ديري الزيت في يدك باه تجيك ساهلة كي تلايميها لاخاطر تقعد تلصق شوية في اليد
ونشكلها حرابش صغار على طول الاصبع نتاعنا ونرمدهم وجهم برك في السكر ونديروهم يطيبو من التحت ونزيدو نحمروهم من فوق شوية

نخليكم مع الصور توضح احسن ان شاء الله برك ماديرهاش بيا النت








هي وصفة ساهلة بصح مليحة مع القهوة وماتديش منك وقت كبير وتقطع كمية كبيرة
اللي دخلت لموضوعي تدعيلي ربي يهنيني ويفرحني بوليداتي ويقدرني على تربيتهم



©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©