عنوان الموضوع : سمعتى عن ريجيم السواااايل بتقولى لأ طب تعالى اعرفك على اسهل واسرع ريجيم - انقاص الوزن
كاتب الموضوع : hanan
مقدم من طرف منتديات ايمازيغن

السلام عليكم ورحمه الله وبركاته

ازيكم غالياتى جميعا يارب تكونوا بالف خير

طبعا فى منكم اللى سمع عن دايت السوايل وفى اللى ميعرفوش خالص
وفى اللى عارفه ولكن بطريقه خاطئه
للعلم ده يكاد يكون اسهل واسرع واكثر الريجيمات متعه وراحه لانك بتاكلى كل ماتشتهى ولكن
فى صوره سايله
يعنى هتاكلى
شوربات اى نوع فراخ لسان عصفور شوفان ملوخيه وعصاير وايس كريم وشيكولاته ومشروبات ساخنه زى النسكافيه والكابتشينو وزبادى والبان كللللل حاجه

طب نشوف فكرته ايه
لان عارفه ان فى واحده هتسألنى تقولى طب مابدل ماخد كوبايه عصير فراوله ماانا اكل فراوله احسن ايه الفرق انها تدخل جسمى بصوره سايله

هقولك تعالى



فكره الريجيم هى ان السوايل اولا بتنشط الدوره الدمويه وبالتالى بترفع من معدل الميتابوليزم او معدل حرق السكريات والدهون ثانيا بتملى المعده
بسرعه فبتحسى بالشبع ثالثا ان السوايل سريعه الهضم عشان كده مش بتتحول لدهون ثلاثيه صعب تفتيتها بعد كده رابعا بتحسن من مستوى الاداء العضلى لان تكوين الخلايا العضليه معظمه ميه فبتحول الكتله الدهنيه الى كتله عضليه وهذا هو المطلوب وهو هدف الريجيم خامسا بتعمل كملين للمعدع وبتحسن اداء الجهاز الهضمى وعشان كده هتحسى انك بتروحى الحمام كتير وده دليل انها مبتتخزنش فى الجسم كدهون فهمتوااااااااااا ياقمرات


وهديكوا مثال لليوم مثلا


 هنصحى الساعه9 او 10 الصبح ولازم يكون الفطار بدرى عشان منضطرش نتعشى متاخر وننام ماشى هنصحى نشرب كوبايتين مايه وهنحط على كوبايه واحده بس فيهم نص ليمونه ونشرب الكوبايتين يعنى واحده عاديه وواحده بليمون والموضوع ده ثابت طول الشهر بتاع الدايت الحكايه دى لما جربتها بجد اولا بتسد النفس وبعدين بتخفى اليطن خاااااااااالص والله العظيم يابنات بطنى دخلت جوه تمام فابداوا بيها هتجيب نتيجه حلوه اوى معاكوا وبالذات الناس اللى عندها بطن


بعد مانشرب الميه بساعه يعنى الساعه 11 هنشرب كوبايه لبن متحليه بالعسل الابيض لو مفيش عسل ابيض نستبدله بالسكر مفيش مشكله الوصفه دى مفيده للى بيرضعوا وكمان للى عندهم امساك دى هتعالجها بس اللبن ياريت يكون دافى عشان يعمل كملين الصبح تمام


الساعه 12 هنشرب اى نوع عصير فريش او معلب بسكر او من غير سكر بس ياريت لو بسكر منكترش اوى معلقتين كفايه ممكن برتقال - جوافه - موز باللبن - فراوله - مانجه ... اى عصير
العصير هيديكوا طاقه ومش هيخلى فى هبوط لانه هيرفع نسبه السكر فى الدم لحد كده تمام


الساعه واحده هناخد اى حاجه دافيه من غير سكر او بمعلقتين سكر برضه يعنى ممكن نشرب (ينسون - نعناع - قرفه بلبن مفيده جدا - جنزبيل - نسكافيه - شاى بلبن - بردقوش - قهوه - شاى - وممكن كابتشينو للى متعودين عليه .... واى حاجه دافيه ) الحاجه الدافيه بتقفل المعده شويه وبتحسس بالشبع وهتريح الاعصاب والتوتر اللى بييجى من الريجيم


الساعه 2 اللى هو قبل الغدا بساعه هناخد علبه زبادى او كوبايه لبن رايب وعليها معلقتين عسل اسود طعمها جميل ومفيده جدا للانيميا وسقوط الشعر والحوامل كمان


الساعه 3 وقت الغدا تقريبا ودى تعتبر الوجبه الرئيسيه بتاعنا هناكل ايه ؟
ممكن شوربه عدس هتقولولى بشعريه ولا لأ ممكن تكلوها بشعريه مفيش اى مشاكل بس ياريت لو تحمروها فى زيت افضل ابعدوا عن السمنه الزيت اخف بكتير وبعد مانستوى فى العدس هنضربهم فى الخلاط وبالهنا والشفا وطبعا انتوا عارفين العدس فيه ايه ( عدس-طماطم-بصل-توم-حزر-بطاطس-شعريه)يعنى وجبه كامله متكامله فيها كل العناصر الغذائيه هناخد من الشوربه دى طبق كبير او بمعدل كوبايتين وهنتغدى بيهم ماشى ياقمرات
وممكن نشرب شوربه خضار عادى وبكره هنزلكوا شوربات جديده بطريقه عمايلها كلوا دى بس كبدايه تمام

الخطوه اللى جايه دى بقى مهمه ودى نصحنى بيها الدكتور عشان الاكتئاب اللى بييجى لكل واحده فينا بتعمل ريجيم وهو انى اكل كل يوم بعد الغدا بساعه قطعه شيكولاته صغيره دى بتحسن المزاج وبترفع الحاله النفسيه وبتخليكى مش مكتئبه من الريجيم مهمممممممممه وهندخل بقى نعمل ساعه رياضه مشى فى المكان على فكره انا كنت بعمل كده كنت بجيب كرسى السفره واخلى ضهره ليه وانا واقفه وامسك فيه واقف قدام التليفزيون اتفرج على مسلسل مسرحيه فيل او اسمع اغانى اى حاجه تسلينى عشان محسش بالوقت وخلاص حتى لما يكون عليه البريود بشغل الكاسيت وبرقص ساعه متواصله بجد يعنى متحججتش بقى وقلت لا انا هعمل ازاى والكلام ده لا اللى عاوز يوصل لحاجه هيوصلل لها وربنا بيدى كل واحد على قد تعبه تمام ياقمرات شجعوا نفسكوا


حوالى الساعه 5 اى حاجه تيجى على بالك او نفسك تاكليها دى ساعه فرى بس ايه برضه تكون سايله بمعنى هناخد مثلا ( بوله ايس كريم - كاسترد شيكولاته - مهلبيه - موس شيكولاته - ميلك شيك - كوب بيبسى - ..... الخ اى حاجه تحبوها بس سايله دلعوا نفسكوا


الساعه 6.5 تقريبا لازم تسيبوا فتره بين الوجبه والتانيه هناخد ايه (عصير كوكتيل - عصير طماطم - كوب قرفه بجنزبيل تحححححفه وبيخسس جامد وعن تجربه - كركديه سكر خفيف - كوب لبن رايب - او شاى او قهوه ) بس دى الاختيارات متلخبطوش



الساعه 7.5 ممكن ناكل طبق صغير شوربه عدس او شوربه خضار وممكن معاه صدر فرخه مسلوقه ومضروبه معاه او نشرب اى نوع عصير فريش او معلب

الساعه 9 ودى اخر وجبه هناكلها كوب لبن دافى متحلى بالعسل وبالسكر تانى مفيده اوى وبعدين فى ابحاث اثبتت ان كل ما زاد معدل الكالسيوم فى الجسم بتساعد على حرق الدهون بنسبه 18 % وبعدين عشان نعالج الامساك ماشى ياحلوين


ياريت بقى متكلوش اى حاجه بعد الساعه 9 وهنا بقى تكمن الكارثه لاننا بناكل وبننام فيلريت الالتزااااااااااام ياجماعه عشان ربنا يكرمنا جميعا



صدقونى نظام ممتع وجميل وسهل جدااااااااا
واتحدى اللى يجربه انه مش هيخس اقل من 3 كيلو فى الاسبوع ده لو مش اكتر يعنى ومجرب على ناس كتير ومعرفه شخصيه كمان اتمنى تجربوه
فى رعايه الله


قد تكوني مهتمة بالمواضيع التالية ايضاً:





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©