عنوان الموضوع : كشرى مصرى جدا من مطبخى بالصور طريقة عمل الكشرى المصرى بالصور - طبق شعبي
كاتب الموضوع : imilla
مقدم من طرف منتديات ايمازيغن




عاملين ايه حبيباتى
طبعا كلنا عارفين الكشرى المصرى اللذيذ
انهارده بقدمهلكو بطريقه بسيطه وسهله
يلا بينا عالمطبخ
المقادير
1/2 ك مكرونه صغيره
1/2 ك ارز مصرى
1/4 ك شعريه
1/4 ك عدس بجبه
1/4 ك حمص الشام
3/4 كيلو طماطم
2 بصله كبيره
راس ثوم كبيره مفرومه
معلقة زيت
خل / ملح / كمون / ليمونه
الطريقه
اول حاجه بعملها بنقع الحمص من قبلها بيوم عشان تسويته تبقى سهله
بعد كده بحطه عالنار ولما الميه تغلى وهيدخل فى السوى بحط 1/2 كوباية عصير طماطم ومعلقة ثوم مفروم وملح وكمون وليمونه عشان يطلع زى حمص الشام بتاع بره
ودى صورته وهو فى الحله

تانى حاجه المكرونه
هنسلق المكرونه فى ميه مغليه ونضيفلها معلقة ملح كبيره اثناء السليق
بعدها هنصفيها ونغسلها غسله بسيطه ونحط عليها معلقة زيت صغيره ونقلبها كويس ونسيبها
زى كده

شوفى بتلمع ازاى من الزيت وكمان لو فضلت لتانى يوم مش هتنشف
نيجى للرز
هنغسل الرز كويس ونحمر الشعريه وعليها الرز لحد ما يسخنو كويس اوى بعدها نضيف الملح والميه المغليه ونسيبه يغلى لحد ما يتشرب زى الصوره

بعدها نوطى النار عليه ونسيبه يستوى براحته
على فكره انا بعمل رز الكشرى بزيت العباد او زيت الذره عشان يلمع ويبقى خفيف
العدس
هنغسل العدس كويس وعالنار هنحطه يتسلق وزى الحمص هنحطله ملح وكمون زى الصوره

اول ما يستوى بصفيه من الميه بتاعته عشان لو فضل فيها بيتهرى وبيستوى زياده
البصل او التقليه
هنقط بصلتين كبااااااااااار شرايح رفيعه ولو عندك ماكينه الشيبسى يبقى تمام اوى و لو معندكيش قطعيه بسكينه حاميه على لوح التقطيع
هنحمره فى زيت غزير لحد ما توصلى للون اللى بتحبيه
بعد كده خدى بالك عشان يطلع مقرمش ومش شارب زيت
هنصفيه كويس جدااااااااا من الزيت بتاعه ونحط تحته حاجه تشرب اى بواقى للزيت (مندايل المطبخ او ورقه بيضا) ولما يبرد حطى عليه برضه رشه بسيطه ملح وكمون وشيليه من الورقه او المنديل فى طبق تانى نضيف
وده شكله

شايفه مش ملزق فى بعضه وناشف ازاى
واخيرا الصلصه
هنضرب الطماطم فى الخلاط بعد ما غسلناها كويس وعالنار الحله فيها زيت عباد او ذره ونحمر فيها الثوم ولما يصفر لونه هنضيفله الخل ويغلى بسيط بعدها هنحط الطماطم ومعلقة كبيره صلصه (ممكن الاستغناء عنها) لحد ما تتسبك
بعدها هنغرف وتاكلى احلى كشرى واحلى من بتاع بره واضمن فى نضافته كمان وده الشكل النهائى

والصلصه لوحدها زى المحلات

وكمان بحب برضه اقدم البصل لوحده
يارب يكون عجبكم
والى لقاء اخر بأذن الله



قد تكوني مهتمة بالمواضيع التالية ايضاً:





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©