عنوان الموضوع : ملخص الإجتماعيات للفصل 2 ^__^
كاتب الموضوع : kouka
مقدم من طرف منتديات ايمازيغن

كتبته بالدارجة باش نسهلو، أنتظر ردودكم، و إن شاء الله يفيدكم و يسهل عليكم الفهامة ^_^
.
.
.
التــاريــخ
الإستعمار الفرنسي للجزائر "الأسباب و الأهداف"
1/وشنو هي الأسباب اللي خلات فرنسا تحتلنا:
*الإقتصادية:
- كانت حابة تسيطر على أموال دولتنا.
- حبت تستغل خيراتنا.
- كانوا عندها ديجا ديون خارجية.
*الإجتماعية:
- كانوا عندها أزمات بعد ما دارت حروب نابوليون.
- ولات فيها البطالة و الفقر بزاف.
- التذمر الإجتماعي فيها.
*السياسية:
- باش تمحي الهزائم تاوعها.
- باش تشغل الجيش تاعها.
- باش الشعب يحبس المعارضة تاعو ضد شارل ال10 و يلتهاو غير في الجزائر.
2/واش هي أهداف هذا الإستعمار:
- حبت تنصرنا.
- حبت تنافس بريطانيا و تدخل في عمق إفريقيا.
- حبت تتخلص من ديونها و تسيطر على خيراتنا.
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــ
السياسة الإستعمارية للجزائر
1/كيفاش كانت مظاهر السياسة الإستعمارية علينا:
- دارت قوانين و إجراءات.
- إرتكبت مجازر كيما "مذبحة فراشيش 19/10/1845م".
- السياسة تع الأرض المحروقة اللي دارها "بيجو" بعد ما ولا حاكم في "1840م".
- القانون اللي دارنا تحت الحكم العسكري.
- السياسة تع الإستيطان اللي عبر عليها الجنرال كلوزيل"لا يمكن أن نغرس العروق هنا إلا بواسطة الهجرة الأروبية".
*إداريا: القوانين و المراسيم كيما :
- إلحاق الجزائر بفرنسا "1834م".
- قانون الأهالي"1871م".
- تقسيم الجزائر ل3 مقاطعات "1845م".
- التجنيد الإجباري "03/02/1912م".
*إقتصاديا :
- بداو يصادروا في أملاك الأوقاف.
- شوهوا ملكية الأعراش.
- سلبوا كامل الأملاك تع الثائرين.
*ماليا:
- فرضوا ضرائب على الجزائريين.
- داروا مجلس باش يسيروا المالية الجزائرية.
*إجتماعيا:
- ولات عندنا المشاكل تع سوء التغذية و السكنان و الهجرة.
- داروا الأسماء تع كلش بالفرونسي.
- شوهوا التاريخ الجزائري.
- حاولوا يتخلصوا من الهوية الجزائرية.
*قضائيا:
- دارو قوانين باش يمحيوا التشريع الإسلامي.
*دينيا و ثقافيا:
- كانوا حابين يمحيوا اللغة الجزائرية.
- داروا صحافة فرنسية.
- دمروا المساجد و شجعوا المسيحية.
2/وشنوا هي الإنعكاسات السياسية الإستعمارية:
- الجزائر ولات مقاطعة فرنسية .
- زرعوا عاداتهم الفرنسية في عاداتنا.
- محاو الشخصية الإسلامية عندنا.
- نشروا الدمار و الخراب بالحملات العسكرية و سياسة الأرض المحروقة.
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ
المقاومة و رفض الوجود الإستعماري الفرنسي و مظاهره
1/كيفاش كانت الأساليب تع المقاومة:
*المقاومة المسلحة "1830/1848": كيما تع أحمد باي في الشرق و هي "مقاومة رسمية منظمة" ،و كاين ثاني مقاومة الأمير عبد القادر اللي كانت "شعبية في 1832/1847".
*المقاومة السياسية: عبروا عليه على شكل رسائل للمسؤولين تع فرنسا بعد الحرب العالمية 2 وعلى هاذي تطور النظام السياسي الثقافي على خاطش جات النخبة و القيادات الفكرية، همالا ولات تتسمى الحركة الوطنية ضمن :
أ.التيار الإصلاحي: تع الأمير خالد"1919م"، و حزب الإيخاء الجزائري، و جمعية العلماء المسلمين "05/05/1931"، و كيما إبن باديس اللي كان يلقي محاضرات في المدارس.
ب.التيار الإستقلالي: بدا مع نجم إفريقيا"1926م"في فرنسا و اللي كان أول من دعا للإستقلال التام ،ممبعد ولا تنظيم جزائري و سماوه "حزب الشعب الجزائري 11/03/1937م" و بعد الحرب العالمية 2 سماوه "حركة إنتصار الحريات الديموقراطية"، ممبعد ولا جناح عسكري و ممبعد "منظمة اللجنة الثورية للوحدة و العمل في فيفري 1947م".
ج.التيار الإدماجي "الليربالي": قاده صالح بن جلول ممبعد فرحات عباس "1943م" و سماوه "التيار الليبرالي و أحباب البيان و الحرية"، ممبعد "الإتحاد الديموقراطي للبيان الجزائري"،و بقى كاين حتى ندلعت الثورة.
د.التيار الإجتماعي"الشيوعي": تأسس في "25/01/1936م" و عمر أورزلان هو رئيسه ،كان حاب يطالب بالجنسية الفرنسية و كان حاب يرد الجزائر مرتبطة بفرنسا.
2/وشنو هي الأهداف اللي حبت توصل ليها المقاومة:
- كانوا حابين الجزائر تستقل و تحقق سيادتها الكاملة.
- تعاود تسترجع الخيرات و الأراضي تاوعها.
- حبت تضمن الإستمرارية تع الدولة.
- كانت تسعى باش تخيب المخططات تع الإستعمار.
3/تقييم نتائج تع الثورات:
- باش نعرفو بلي لازم نصمدو و نرفضو الإحتلال.
- باش الإستعمار ما يزيدش يتغلغل كثر و كثر في المناطق الداخلية.
- نأكدوا اهمية الإتحاد كيما في "المؤتمر الإسلامي1936م"،و"البيان الجزائري في فيفري 1943م".
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــ
الجــغرافــيا
الواقع الإقتصادي و الإجتماعي غداة الإستقلال
1/كيفاش كانت الحالة إقتصاديا غداة الإستقلال:
*الزراعة: كانوا فيها زوج أقسام:
أ.الزراعة التقليدية المعاشية: كان عندها مردود قليل بزاف تعتمد على الأمطار و الأدوات البسيطة و تعاون بنسبة قليلة في الدخل تع الإستهلاك .
ب.الزراعة الحديثة التجارية: كانت كاينة في السهول الخصبة و هي زراعة نقدية "تجارية" كيما كي يزرعوا التبغ و الكروم و يبيعوه، هذا القسم يستعملوا فيه التكنولوجيا و لازملو رؤوس أموال، يساهم ب60 بالمئة من الإنتاج الزراعي، و يشغل70 بالمئة من السكان مبصح يقدم غير40 بالمئة من الإنتاج الوطني و22 بالمئة من الدخل القومي، و علي المردود تع الزراعة ضعيف هكذا؛ الجزائر بالسيف عليها لجأت للإستيراد من الخارج.
*الصناعة: الوضع تعها ماكانش أحسن من الزراعة،على خاطش كانت ثقيلة بزاف و مشلولة على خاطش ماكانش كاين قاعدة صناعية،و الإطارات الأروبية اللي كانت تسير الإقتصاد الوطني إنعدمت، و رؤوس الأموال تهربوا، و تميزت الصناعة بالطابع الإستخراجي اللي يتمثل في تصدير المواد الخام كيما البترول و شوية صناعات خفيفة أخرى اللي تروح مباشرة للأسواق المحلية باش يستهلكها الشعب.
*التجارة: كانت تتميز بالإرتباط مع الخارج "تبعية مطلقة" و وصل الإقتصاد الوطني تعها ل80 بالمئة و اللي تشمل الصادرات كيما الغاز و البترول و الحديد ،و الواردات كيما مواد التجهيز و المواد الغذائية.
2/كيفاش كانت الحالة إجتماعيا غداة الإستقلال: بكل إختصار كانت عبارة على كارثة خلاهالنا الإستعمار موراه ، كيما :
*التعليم: كانوا الجزائريين يقراو في الكتاتيب على خاطش المدارس كانوا يستقبلوا غير شوية تلاميذ في سبب السياسة تع التجهيل اللي خلاها الإستعمار، و بزيادة على هاذي الجزائر كانت تعاني من النقص تع المعلمين و المدارس و التعليم كان غير في المدارس الكبرى تع الجزائر.
*الصحة: ثاني كان في أزمة في سبب النقص تع الرعاية الصحية و المستشفيات و الأطباء اللي كانوا قريب كامل جايين من فرنسا، و على هاذي إنتشر الفقر و سوء التغذية و الجوع .
3/وشنو هوما المظاهر تع الإختلال الإقتصادي:
- كان كاين خسائر كبيرة في السكان.
- إرتفعت النسبة تع الأمراض و المشاكل الصحية بزاف.
- الأرباح نقصت بزاف.
- ما قدروش يعوضوا الخسائر على خاطش ما كانش الإختصاص بزاف.
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ
التحولات الإقتصادية الكبرى
1/وشنو هي العوامل تع التحولات الكبرى:
بعد الإستقلال إنتهجت الجزائر النظام الإشتراكي يعني "من 1962م حتى 1990م"، مبصح هذا النظام شافت فيه الجزائر غير الخسارة كيما الإنخفاض في السعر تع النفط ، و بعد كل هذا الفشل اللي جابوا هذا النظام ،الجزائر قررت باش تعدل الدستور في"1986م" و دارت النظام الرأسمالي في"1990م" و اللي كان يشجع القطاعات الفردية .
2/وشنو هوما مظاهر التحول الإقتصادي:
*الزراعة: و اللي عملت على تحسين العيش تع الفلاحين و ثاني سعات باش تحبس النزوح الريفي و تشغيل الفلاحين الصغار و ثاني عملت على إقرار نظام التسيير الذاتي في"مارس 1963م" و تحرير تسويق الخضر و الفواكه في"1982م"، وأخيرا ثاني قدرت الدولة توفر المناصب للخدمة و عاودت الهيكلة للقطاع الفلاحي.
*الصناعة: بعد الإستقلال عاودت الجزائر تبعت النظام الإشتراكي و اللي قدرت بيه تبني سوق صناعية كيما شركة سوناكوم في"24/02/1971"و قدرت ثاني تطور اليد العاملة ،و بعد هاذا لقات الدولة بلي ماهيش مستفادة كامل همالا توجهت لإقتصاد السوق في النهاية تع الثمانينات،و هكذا عاودت ولات تحت النظام الرأسمالي، و من نتائج هذا النظام: إعادة الهيكلة للقطاع الصناعي و هاذاك بفتح المجال للمبادرة الفردية و شجعت الإستثمارات الخارجية و الإستثمار تع الأراضي.
*التجارة: تبان في زوج جوانب أساسية :
- التجارة تنوعت و تطورت الهياكل القاعدية تعها.
- قضاو كامل الحاجات تع السكان و تع الإقتصاد الوطني.
- عاودوا رجعوا للإقتصاد تع السوق"الإشتراكي" اللي حرر التجارة الخارجية.
- شجعوا الإستثمارات الوطنية و الأجنبية.
أ.الصادرات: تشمل البترول و الغاز بنسبة 21.97 بالمئة و بالزيادة الفحم و المواد تع المعدن و الزراعة.
ب. الواردات: تشمل المواد الصناعية و الغذائية و التجهيزات، و علي زادوا السعر تع النفط و زادت الحاجة لمواد الطاقة لقات الجزائر فائض في الميزان التجاري بقدر 05 مليار دولار.
3/وشنو هي أسس التنمية الإقتصادية:
- علي نتهجت النظام الإشتراكي اللي قام على ملكية الدولة لوسائل الإنتاج.
- إقامة الصناعات الوطنية.
- الصادرات و الواردات تنوعوا.
- الدولة قدرت تحقق الإكتفاء الذاتي.
4/وشنو هي المشاكل اللي إعترضت التنمية:
- رؤوس الأموال قليلة .
- البطالة.
- ما يعرفوش يتحكموا في التكنولوجيا.
- كثرة ظاهرة البيروقراطية.



©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©