عنوان الموضوع : هتولدى قريب و بتجهزى حاجة البيبى ؟؟ ... خدى بالك من الحاجات دى - الحمل و الولادة
كاتب الموضوع : kamiliya
مقدم من طرف منتديات ايمازيغن

السلام عليكم و رحمة الله و بركاته


طبعا أى حامل - خصوصا لو لأول مرة - بتبقى عايزة تجيب أفضل حاجة لابنها او بنتها
سواء لبس او منتجات عناية بالشعر و البشرة او مستلزمات رضاعة و تغذية
اى حاجة لازم تكون مريحة و آمنة على الطفل

انا من واقع تجربتى .. كنت بأبحث كتير ع النت عن الافضل للبيبى
و كنت بادخل مواقع عربى و اجنبى و كل حاجة
و قلت افيد الفتوكات حبايبى معايا
هاقولكم على شوية نصايح تاخدوا بالكم منها و انتو بتشتروا حاجة البيبى


أولا : الملابس
-------------------

- أكتر نصيحة هاتسمعيها من كل حد و ف كل مكان هى :
ما تجيبيش من اللبس مقاس زيرو لأن البيبى بيكبر بسرعة و الهدوم دى مش هاتنفعه غير اسبوعين تلاتة او شهر بالكتير
الافضل تجيبى مقاس 0-3 شهور و ماتكتريش منه بردو

- طبعا الملابس تكون قطنية 100% خصوصا الملابس الداخلية الملامسة لجلد البيبى

- اعداد اللبس انتى تحدديها بنفسك حسب ميزانيتك و حسب الجو اللى هايتولد فيه البيبى صيف ولا شتا
مش لازم تلتزمى بأى اعداد تشوفيها ع النت

1- الملابس الداخلية :


- هاتلاقى نوعين من الملابس الداخلية اللى بتتلبس من فوق
النوع اللى هو فانلات عادى مفتوحة من تحت سواء كت او نص كم او كم
النوع التانى اللى هو بكباسين من تحت و بردو فى منه كت و كم و نص كم

النوع الثانى افضل
لان البيبى بيتشال و يتحط كتير ف الكباسين بتضمن ان اللبس يفضل مغطيه طول الوقت
و مش يتبهدل
و لو مثلا البيبى ما شاء الله طول و الكباسين مبقتش تقفل عليه
هايلبسه عادى مفتوح كأنه فانلات عادية مفيش مشكلة


- بالنسبة للبناطيل الداخلية
هتلاقى منها نوعين بردو
النوع الاول اللى بيبقى ملموم بأستك من تحت
زى اللى على اليمين
و النوع التانى المفرود
زى اللى على الشمال
النوع الاول اللى ع اليمين افضل
لانه هايفضل محكوم بقدم البيبى مش هاينزل من عليها " يدلدل يعنى "
و كمان لو حبيتى تثنيه عشان تقصريه .. التنية مش هاتتفك بسهولة
و العكس مع النوع التانى


2- الملابس الخارجية :

- لو هاتجيبى سالوبيتات تاخدى بالك ان الازرار او الكباسين تكون ممتدة بطول السالوبت كلها
يعنى لحد رجل البيبى تحت عشان تبقى سهلة ساعة تغيير الحفاض
و بلاش اللى بتبقى الزراير فيها لحد البطن بس
و بلاش بردو من اللى ازرارها من ورا
- اى حاجة تجيبيها سواء سلوبت او تيشرت
لازم تتأكدى ان فتحة الراس واسعة او تقدرى توسعيها بزراير او كباسين
عشان ماتضايقيش البيبى و انتى بتلبسيه
يعنى ممكن تيشرت مفتوح بزراير من قدام
او مفتوح بزراير او كباسين من ورا
- ملابس تكميلية :

- البافتات :
يفضل تكون قطن بس مغلفة من الداخل بمشمع عشان تمنع البلل انه يوصل للبيبى
و فى منها انواع

نوع برباط من عند الرقبة فقط
مش بيثبت خالص على صدر البيبى بيتحرك يمين و شمال و بيبقى ولا ليه لزمة
و كمان الرباط بيضايق لبيبى و لو مفكوك شوية ممكن يشده و يعور رقبته


نوع برباط من عند الرقبة و حول البطن
- الايس كاب ... يستحسن تجيبى تلات الوان محايدة مثلا عشان يليقوا ع اللبس كله
و يلبسه خصوصا بعد الشاور عشان يدفى راسه
- جوانتى المواليد ... ده بيبقى جوانتى بس من غير صوابع بيتلبس ف ايده عشان ما يخربش نفسه بضوافره
- الشراب بردو يكون قطن و فى منه صيفى و شتوى تدفئة و شياكة
منقول


قد تكوني مهتمة بالمواضيع التالية ايضاً:





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©