عنوان الموضوع : (لو كان الطفل بيخاف يبقى لوحده مثلا..نعمل اية؟)- لرعاية طفلك
كاتب الموضوع : hamida
مقدم من طرف منتديات ايمازيغن


(لو كان الطفل بيخاف يبقى لواحده مثلا..نعمل اية؟)

السبب فى كدا زى ماقولنا ان موقف حصل للطفل وكان لواحده فخاف بعد كدا يكون لواحده
او شاف حاجة فى التليفزيون او سمع قصه خوفته وكان لواحده
فربط الشئ المخيف بوجوده لواحده..فنشئ عنده الخوف ده

والحل اننا نغير الموقف ده فى ذهنه بالتدريج..بإننا نربط وجوده لواحده بموقف حلو
زى مثلا فى يوم نجهزله هدايا أو حاجات هو بيحبها..ونسيبه لواحده مثلا فى الصالة ونغيب عنه شوية..وبعدين ندخل عليه بالهدايا
أو مثلا نجرب نلعب معاه استغماية..ونستخبى منه مرة ويستخبى منا مرة
هيبقى وجوده لواحده مرتبط بلعبة حلوة مع ماما وبابا فيقلل الخوف عنده شوية
المهم انه يربط الاحداث الحلوة بوجوده لواحده فخوفه منها يقل

كمان ممكن نغير ده بالتدريج عن طريق القصص
إحكيله قصة ولد شجاع بيقدر يعتمد على نفسه..أو قصص لأبطال
ممكن كمان نلعبى معاه العرائس المتكلمة
نجيب مثلا دبدوبين هو بيحبهم
ونمثل أدامه تمثيلية بالدبادين
مثلا:

دبدوب1:إزيك يادبدوب اخبارك اية؟
دبدوب 2: انا الحمدلله كويس..انا مبسوط انك جيت دلوقتى..انا كنت خايف وانا لواحدى
دبدوب1: انا كمان مبسوط انى شوفتك..بس ليه خايف تبقى لواحدك؟
دبدوب2: مش عارف..
دبدوب1: لا يادبدوب انت مش لازم تخاف من حاجة زى دى..عارف انت ممكن تعمل إية لو حسيت انك خايف؟
دبدوب2: قولى أعمل اية بسرعة قولى
دبدوب1: انت ممكن تغنى "وتغنيله اغنية..مثلا انا لما بحب اتسالى مابحبش أزأز لب"
دبدوب2:هههههه حلوة الاغنية دى أوى ههههههه..وإيه كمان قولى
دبدوب1: ممكن ترسم رسمات حلوة..ترسم ماما وبابا وتكلمهم..ترسم صحابك
دبدوب2: دى حاجة حلوة خالص..أهو أرسمهم ويكونوا معايا يسلونى عشان ما أحسش انى لواحدى..تعرف انك خليتنى عايز أبقى لواحدى عشان أعمل كل ده..هههههه
دبدوب1: انت يادبدوب أصلا مش لواحدك انت حواليك حاجات كتير شايف الورد والعصافير والسما..وكمان ألعابك معاك
دبدوب2: أيوة صح..انا معايا حاجات كتير..خلاص انا هبقى شجاع ومش هخاف تانى

وان شاء الله بالتدريج خوفه من انه يبقى لواحده هيقل



قد تكوني مهتمة بالمواضيع التالية ايضاً:





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©