عنوان الموضوع : من الان وبتلك الوصفات وداعالامساك نهائيا باذن الله- الطب البديل
كاتب الموضوع : madiha
مقدم من طرف منتديات ايمازيغن
معظم البنات و الستات بيجيلهم امساك . الستات عادة بتعانى من الامساك فى فترة الحمل . و البنات اللى بتدرس او بتشتغل لوقت طويل و بيكون كل اعتمادها على الفاست فوود اكيد بيجيلها امساك . و لما نهمل فى علاج الامساك بيبقى مزمن و لاقدر الله بيسبب شرخ شرجى او بواسير و بيبقى الحمام عذاب ما بعده عذاب . و من مبدأ الوقاية خيرا من العلاج انا جايبة لكم وصفات طبيعية و فتاكة للقضاء على الامساك و مجربة و نفعت معايا بفضل الله
بس الاول ممكن نعرف ايه مسببات الامساك
- نظام غذائى مش بيحتوى على الياف ( مفيدة لعملية الهضم )
- الجلوس و قلة الحركة
- الاسراف فى شرب الشاى و القهوة لان الكافيين مدر للبول
- عدم شرب مياه كافيه
- بعض الادوية اللى بتسبب الامساك زى اقراص الحديد و غيرها
- كثرة استخدام الادوية الملينة لان مع الوقت الامعاء مش بتعرف تشتغل من غيرها
و الحل فى وصفات طبيعية سهلة من غير ما نلف على دكاترة و نشرب ادوية كتيرة طبعا انا فى حاجات نفعت معايا من الوصفات دى و حاجات تانية لا . و اعتقد ان الناس بتختلف فى استجابتها للوصفات علشان كده انتى ممكن تجربى وصفتين او تلاتة فى نفس الوقت لحد ما تعرفى اى وصفة قولونك بيرتاح عليها . و الاهم الاستمراااااااااااااااااا ار يعنى مش اسبوعين و نبطلها لا نخليها لايف ستايل لنا علشان عملية الهضم تنتظم . نتايج الوصفات دى مش بتظهر بين يوم و ليلة علشان كده لازم نصبر اسبوع كده لحد ما القولون يتحسن . و لو عندك امساك فى الوقت ده جربى لبوس الجلسرين ب 130 قرش و مش بيسبب اى تعود مهما تستخدميه و كان نصحنى بيه دكتور باطنة .
اهم الوصفات المنظمة لعملية الهضم
- الشاى الاخضر و ده كله فوايد غير انه بينظم عملية الهضم و بيقلل الكوليسترول و بيحمى الجسم من السرطان لان فيه مضادات اكسدة عالية و كمان بيساعد فى تخفيض الوزن
هنشرب منه 3 مجات فى اليوم قبل الاكل او بعد الاكل زى ما يعجبك المهم يكون من غير سكر او لو نفسك تحليه يبقى بعسل النحل
- الينسون و يعتبر نعمة من ربنا بس احنا مش اخدين بالنا منه بيهدى الكحة و بيروق الاعصاب و بينظم عملية الهضم . برضه هنشربه مرتين او 3 مرات فى اليوم . و الصراحة انا بفضل ينسون ايزيس عن الينسون السايب اللى من عند العطار
عموما انا الينسون و الشاى الاخضر قولونى بيرتاح عليهم
- زيت الزيتون و يستحسن يكون نوع اكسترا فيرجن مش لازم الاسبانى ممكن وادى فوود كويس برضه . بتشربى معلقة على الريق
- اللبن و قبل ما تنامى تشربى كوباية لبن دافى محلية بعسل نحل هتصحى تدخلى الحمام بامر الله . و ممكن تاخدى التمر باللبن و لو مش بتحبى التمر يبقى خليكى فى اللبن بالعسل
- المياه تشربى حوالى 3 لتر فى اليوم . انا عارفة انها حاجة صعبة بس كل شىء بالتعود . انا اقصى كمية بقدر اشربها لتر و نص او لترين . بس ربنا معانا بقى و نوصل ل 3 لتر
- الخضروات الفريش و هقولكوا على فكرة حلوة للى بتعمل ريجيم علشان ما يجيش لها امساك . قبل معاد الغدا بساعة كده تعملى طبق سلطة كبير ( طماطم - خيار - كابوتشى - فلفل الوان - جزر - بنجر ) اللى يعجبك يعنى و تحطى ملح قليل و زيت زيتون . اولا هتقضى على الامساك و ثانيا هتققل شهيتك للاكل و الرمرمة هههههههههههه
- المشى من منطلق ان الحركة بركة و بلاش تقعدى بروتة كده. اتحركى و اعملى شغل البيت او ما تستخدميش الاسانسير او انزلى قبل بيتك بمحطة و اتمشى . نص ساعة مشى يا جدعان هتفرق فى صحتنا كتير
- التمر هندى مشروب رمضان الرائع و ده عن تجربة مش بينظم الهضم و بس لا ده كل ما اشربه يجيلى اسهال
طبعا دى الوصفات اللى اعرفها و جربتها و زى ما قلت ان اللى نفع معايا اكتر حاجة الينسون و الشاى الاخضر
و اتمنى اكون افدتكم بخبرتى البسيطة
قد تكوني مهتمة بالمواضيع التالية ايضاً:
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©
رد مع اقتباس
