السلام عليكم ورحمة الله وتعالى وبركاته
ان شالله تكونو اخواتي بالف خير
من مدة عملت تارت جينواز محشية على شكل قلب
طلبت الوصفة مني الاخت ميمي53
حبيتنحطهالها باه ما تقولش عني بخيلة
المهم العجينة هي عجينة جينواز عادية لازملها فقطا لدقة في صنعها
المقادير لعجينة الجينواز :
6 بيضات
100 غ سكر احرش
100 غ فرينة
مغرفة صغيرة خميرة حلوى
الطريقة :
نظلعو البيض مع السكر لمدة تقريبا 20 دقيقة بالباتور حتان يرجع الخليط كثيف ويبتدل لون البيض يرجع المزيج ابيض
بعد ذلك نضيفو الفرينة بالتدريج ونخلطو بملعقة مسطحة من الاسفل للاعلى وما تنسايس نص مغرفةنتاع الخميرة
بعد هذا نفرشو ورق الزبدة ونفرغو فوقو الخليط وندخلوه يطيب
هاهي الصور
بعد ما طابت الجينواز نتاعنا نجيبو المول الكبير ونقصو الشكل اللي حبيناه
انا ما صورتش المراحل بالخطوات
على العموم بعد ما كنا قصيناه بالشكل اللي حبينا نحطو قلب الجينواز وسط المول اللي قصينا بيه ونشربوه بالشربات نحطو 100 سكر و150 ماء يغليو علىا لنار بعد ما يذوب السكر ويبدى يثقال الخليط نشربو بيه الجينواز
بافي الفتات نتاع الجينواز نقصوه صغير خلالاص نذوبو علبة شيكولا نخلطوها مع الفتات هاذاك ونكونو طلعنا لاشنتيي نضيفو 3 ملاعق شنتيي لهذاك الفتات ونخلطو الكل مع بعضو
يعني نكونو عملنا خليط من باقي فتات الجينواز رح نحشو بيه الجينواز نتاعنا بعذ ذلك نجيبو البندق نكونو رحيناه نحطوه مع الخليط ونزيدولو لاغوم ذوق بندق
نقطعو حبات الكيوي عرضيا نسدفوهم على جانب المول ونحطو الحشو نتاعنا في الوسط
نبسطوه مليح ونحطو فوقو لاشنتيي ونبسطوها مليح تاني
بعذ ذلك نجيبو الجينواز التانية الي كنا طيبناها وفصلناها نشربوها ونحطو الجيهة المشربة من الاسفل ونغلقو
صار عندنا طبقة جينواز من الاسفل على الجوانب كيوي وفي الوسط خليط باقي الجينواز مع الشوكولا ولاشنتيي والبندق ومن الفوق جينواز
درك نوصلو للشكل الاعلى
انا عملت لاجولي مع الجيلاتين
حطيت لاجولي سخنت شوي وحطيت فيها الجيلاتين والملون الاحمر ونخلط علىنار دافية حتان ذابت الجيلاتين
بعد ذلك صفيتها في مصفاه باه ترجع متجانسة وماكانش حتى حبوب فيها
وحطيتها فوق لاتارت وعلى طووول الى الثلاجة باه تحكم روحها مليح وتجمد الجيلاتين
هنا بعد ما خرجتها
وزينتهاعلى الجناب بالشانتيي وحطيت الفواكه والتيين رح يكون حسب الرغبة
وهذي شكلها على جنب
وهاذي من فوق
نتمنى انني نكون وفقت في الشرح اي استفسار انا في الخدمة
ربي يوفقكم اخواتي
رد مع اقتباس
