عنوان الموضوع : سلاطة مهراس او الزفيطي من مطبخي
كاتب الموضوع : khouloud
مقدم من طرف منتديات ايمازيغن

السلام عليكم ورحمة الله وتعالى وبركاته
اليوم درت للغداء سلاطة مهراس او الزفيطي او كاين عنده اسم اخر
ورغم اختلافه حبيت اليوم نحطلكم السلاطة المهراس المسيلية باه تتعرفو عليها وتجربوها لما لا
نبداو بسم الله نحطو الدقيق نعجنوه بالماء والملح

بعد ذلك نشوي الطماطم والفلفل الاخضر الحار والثوم على الطاجين فوق النار

كي يطيبو ننقو الطماطم نحطوها في مرميطة مع كاس ماء وشويا ملح ونقطعو فيها نصف ربطة كسبر

وننقيو الفلفل والثوم نديروهم في المهراس

ونزيدولهم فلفل احمر يابس نغسلوه وننقيوه من الزريعة وملح

نهرسو الخليط اللي في المهراس حتان يصبح رطب ومدقدق

نطيبو الكسرة في الطاجين

بعد ما تطيب الكسرة نطبقوها على 4 ونحطوها في المهراس ونهرسو حتان تدقدق مليح وتتخلط مع الخليط اللي كنا هرسناه من قبل وفي نفس الوقت نكونو لحنا الخبزة التانية في الطاجين وكي تطيب نطبقوها على 4 ونلوحوها في المهراس وندقوه وهي الكسرة سخونة

وبعد ذلك نحطو الخليط نتاع الطماطم والكسبر بالتدريج


ونبقاو ندقو في المهراس حتان تتفتت الكسرة مليح

ونبقاو نضيفو الطماطم والماء نتاعها حتان تختلط كل المكونات مليح
وفي الاخير نحطولها شويا كسبر وشهية طيبة



وكيما موالفة نقوللكم ما تضحكوش عليا
ننتظر ردودكم واراءكم وتقييمكم ونقاشاتكم على سلاطة المهراس





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©