حكايات بنات العدد التاني- للمرأة الجزائرية

[admin]

عنوان الموضوع : حكايات بنات العدد التاني- للمرأة الجزائرية
كاتب الموضوع : admin
مقدم من طرف منتديات ايمازيغن

واش راكم يازينات اللمة يا بنات القعدة والهمة وبربي زياتكم في العسل دايمة
طولنا عليكم الغيبة اسمحولنا ع التأخير
كيما عودناكم بقعدة بنيات اللمة في قصرة جماعية نعالجو واقعنا المعاش
وعضوات العدد التاني راح يكونو
انـــا.
ziassia
Moon_light
ساندريلا زماني


وللتذكير بسير الموضوع زوروآ الموآضيع هذي
حكايات بنات
حكآيآت بنآت العدد الأول



حكايات بزاف يصراولنا واليوم اخترلتلكم عفسة صراتلي ليا وزدت
كونفارميت بلي راني نطير بتخمامي راح نبدا نحكيلكم موقف وكل وحدة
فيكم ترشقني برايها مزيان دوك لعقول.
حكـــاية على القراية او الزواج

عندي وحدة فاميلتي او نقول حبيبتي وختي وشريكتي في كلش حاجة
ماكانت تفرقنا حتى في القراية قرينا كيف كيف لحقنا للباك بون جوزناه وجبناه
منبعد كل وحدة واش خيرت برونش لي يخرج عليها ديرو Pـوز

انا خيرت نكمل قرايتي وهي خيرت الزواج غير خطبوها قبلت كي
تلالقينا جبدنا هدرة قاتلي نتيا رايحة تلعبيها فايقة وتكملي قراية وفي لافان
تكمليها غير في دار قدما تهومي في لافاك تعاودي تولي للدار علاش مانختصرش
انا طريق ونتزوج وندير الدار ياحي لافاك نيــvـو مكان مكان غير
لاسوفخونس انا كي ندير ولاد تكوني نتي غير مزالكي بايرة في قراية هنا
وليت نشوف فيها كحلة قنطتني مي ماخليتهاش في قلبي وعطيتها كلمتها قتلها
كي تولي نتيا تفرخي وتكتري في دراري وشعرك ماتمشطيهش و العفن عند
الباب وتحلي راجلك باش يمدلك دورو اون+ شي راه غالي تخدمو بنزوج
وماتلحقوش صافي مسكين ادا قدر يصرف على ولادو بسيف تولي نتيا مكان
مكان في دار تشتاقي لحاجة انا لتماك نكون بخدمتي ومانتحى حتى عبد نبور
في قراية ولا نتهان في دار لعجوزة(ورجعت لقولتي مور شهرين من زواجها
داربت مع راجلها وتوجوغ يعايرها يقولها نيـvـو تاعك ماتلحقينيش
باغسكو هو قاري وفاهم وخير منها ردها لدارهم ) بيناتنا مالي جات
لدارهم ماحبتش تشوفني حشمت شفتي زهر لموات على لبنات هدي هانة
ولا خليني حمدت ربي على عقل لي مدهولي ورزانة لي عطاهالي جامي نخير
زواج على القراية وين تلحق يعايرك ويقولك ماتلحقينيش علاه قراية غير ليه
من حقنا كامل نقراو وربي واش كتبلنا زواج في غرضو pـوغ لومومون
يكون تالي في لاليست لازم ديري pـوست ديالك في الدنيا يليق بقيمتك
شحال من وحدة تكلختلها تروح تتزوج وتخلي اهم شي قرايتها لي تعبت عليها
سنين باش توصل ويجي في لخر تسمح فيها
واش رايكم زينات عندي الحق ولا غالطة

مداخـــلات البنـــاتـ

اقتباس المشاركة الأصلية كتبت بواسطة Moon_light مغسي إيمآن على الموضوع لي يبآن مجرد منآقشة حآدة بين زوج بنآت , لكن معنآه كبير لمن تفهم المعآني , بزآف بنآت نعرفهم صرآتلهم هكذا يفرطوآ في قرآيتهم , عجآل الزوآج يحسبوآ الزوآج حآجة كبيرة تنصحيهآ تقولك غآيرة مني , ولآ البآيرة هذي خخخ كي مآ تخطبتش جآية تدبّر عليآ , نعرف وحدة تزربت هك بعد وتزوجت إمآم مآ صدقت , هيآ وعدهآ تكمل قرآيتهآ وتزوجوآ وبدآ يعسرلهآ يآ سيدي قآللهآ , ديري النقآب قآلتلو كيفآش نديرو وانآ نقرآ خلي نكمل العآم لي بقآلي ونديرو , وتعرفو الجآمعآت تآعنآ مآ يحبوش على لحوآيج هذو للأسف , كي مآ حبتش قلبهآلهآ قآللهآ مآ تركبيش في النقل , وين نركب ؟ روحي على رجليك أتخيلوآ في النقل تحكم سآعة في الطريق , وبغير نقل شحآل تحكم ؟! مآ حبتلوش أونكوغ المهم كل مرة يعسرلهآ بآش تبطل , بقآت صآمدة حتى جآ نهآر وتقلبت فيه هيآ قآللهآ بآي بآي يآ بنت النآس , وكآنت جآبت منو طفلة بآش كمل حرقهآ الإمآم هذآ لي دهشت فيه , قآللها الطفلة مش بنتي شوكآهآ في الزوآج وجآوهآ لي زوكآزيون مي . من الشوك مآ قبلت بحتى وآحد ورآح التفرفيط تآعهآ مي هي عالأقل طيرت قرآيتهآ , ووحدة أخرى تزوجت بعد وبطلت لقرآية ودرك كي نتلمون حنآ لي جون في , الكل بالحطة واللبسة وهي مع ولآدهآ عندهآ زوج أي ترضع في هذآ , ورآهي تحط ليكوش لهذآ بلآ التبهديلة لي عليهآ وشعرهآ لمكشّب , مي مآ حآيبآش تقر بلي عيآت وزربت روحهآ , أنآ عن نفسي ديمآ حطيت الزوآج في رآسي كمكتوب , وكآن كآتبلي رآني نتزوج مآم بعد مآ نكمل قرآيتي ولوكآن بآلي , في الزوآج كنت تزوجت كي كنت نقرآ ورآني بولآدي درك مي لقرآية أهم , هك الطفلة تقرآ وتتحقر يآ حتي بلآ قرآية يذلهآ رآجلهآ غدوة يقوللهآ الجآهلة , وصرآت قدآم عيني وسمعتهآ بوذني الكلمة هذي هدرهّآ وآحد لمرتو حتى بكآت , جآتهآ طيحة قدآمي ألوغ العلم مليح والزوآج مليح من بعدو ومآلآزمش تأمني , في وآحد يقولك نتزوجو وكملي قرآيتك كمليه والزوآج أو يجي وقتو , هذو عينآت من المحيط تآعي , أي الطفلة مش لآزم تزرب روحهآ وتقبل بأول وآحد يطبطب عالبآب , تقول محرومة تروح تقرآ وتكمل ومن بعدهآ يرحمهآ ربي , أمآ لي مآ قرآتش من اللول وحبست بكري أفضللهآ تروح تتزوج , مآ عندهآ علآش تقعد , كآنشي حوآيج خلآف نتفكرهم عالسـuـجي هذآ رآني نجي نعبّر , p: , مغسي إيمآن أونكوغ , سلآمي ’ Moon_light

اقتباس المشاركة الأصلية كتبت بواسطة ساندريلا زماني بالنسبة لموضوعك ايمانو انا نساندك 100/100 عشت المرحلة هادي لي راكي فيها وفتها وشفت النتائج قدامي لبنات لي مكملوش قرايتهم وتزوجو في وسط لقراية وقتها لقاو الدنيا تزهيلهم غوب وراجل ودلال واحلام وردية بانتلهم بلي راهم حاجة قراو معايا بنات هك وينوضو يتفاخرو زعم هيا اتزوجت وهي تقرا وانتي مازالك تقراي وبلا راجل في اللحظة هاديك تبانلها مليحة مي بعد مايفوت الوقت تجي تشوف تلقى عمرها راح بين البيدون والنشافة ولولاد والراجل ترجع كيما نقولو بونيشة عالمها محصور في جانب واحد . انا كونتر وحدة تخلي قرايتها وتتزوج الطفلة تقرى تجيب ديبلومها وتخدم تضمن بلاصتها والزواج ماش راح يهرب عليها بالعكس كي تعود بخدمتها وقيمتها راح يتمناها ألف واحد وهيا لي تعود البالون في يدها تقبل بلي يعجبها ماش تدي برك تقول راح تبور. نصيحة مني للبنات: اقراو قرايتكم واخدمو تشوفو الدنيا وتكوّنو شخصيتكم باسكو الحياة بعد الخدمة حاجة مختلفة بزاف على لقراية تاع الجامعة مُخك راح ينضج تفكيرك راه يتطوّر وبزاف حاجات تكتسبيهم . ساندريلا زماني

اقتباس المشاركة الأصلية كتبت بواسطة ziassia يعطيكــ الصحة إيمان هذا هو التخمام لي راهو عند لبنات في هذا الوقت سيرتو اذا كان عندها خوها و متالبها تقولك اللول لي يجي يخطب نقبل بييه على حساب قرايتها و مستقبلها ماعلبالييش من واش خايفا اذا خايفة تبور ياك كلش بالمكتوب و لي مكتوب على الجبيين تعيا و تشوفو العيين اتكملي قرايتك و بخدمتك و طموبيلتك افضل ملي تتزوجي و انتي عندك 18 و لا 19 بلا نيفو لا والووو و يولو يعايروك يخيي دركا بخدمتها و متسلكش ماشي حتى لا قراية لا والوو كيما وحدة صحبتي عندها خوها أخينا و نهار جابت البيام مخالهاش تطلع لليسي بسييييييف باش خلاها طلعت لليسي و قاللها حتى و اذا كملتي في الليسي و جبتي الباك الجامعة غيير متطمعييش اومبعد في العام لي جوزنا فييه الباك جاوها خطابة و هذا لي جا خطبها قاللها اذا جبتي الباك كملي قرايتك معنديش مشكل حتى بعد الزواج و هي مجابتش الباك و عسسنا فيها عاودي الباك بلاك تجيبييه و تكملي قرايتك قاتلك لالا درك خلاص راح نتزوج انا واش نديير بالباك ziassia

اقتباس المشاركة الأصلية كتبت بواسطة iméne09 اقتباس مغسي إيمآن على الموضوع لي يبآن مجرد منآقشة حآدة بين زوج بنآت , سـpـيسيالمون حبيتو تكون مناقشة باش يفهمو كتر كل وحدة فينا تعرضت لهاد موقف تحسي روحك قدامهم غلطتي كي حبيتي تقراي حتى يهبلوك لوكان ماتبعديهمش اقتباس عجآل الزوآج يحسبوآ الزوآج حآجة كبيرة تنصحيهآ تقولك غآيرة مني ولآ البآيرة هذي خخخ كي مآ تخطبتش جآية تدبّر عليآ ههههههه هكداك لازم ماتنصحيش تولي نتيا غالطة وماتفهميش وغرتي منها باغسكو جاها مكتوبها ونتيا مزالكي بايرة حبيتي تحرمي عليها انا هدي حبيبتي يماها ولات تحرشها تقولها ماتخرجيش معاها حابة ديرلك مشاكل مع راجلك وتخسرلك تخمامك كي سمعت هاد هدرة حسيت روحي نمامة منها قطعتها ماوليت نحوس عليها ماوالو عرسها حضرتو كي ناس هي تزوجت وتمنيتلها ربي يهنيها وقاسات وعلى بالها كل نصيحة مديتهالها باغسكو نخمم فيها وحبيتلها مصلحتها راجل ماينفعهاش مصيرها يعايرها ويطيح من قيمتها مي كي تكون بديـpـلوم مايحلش فمو كي تكون قادرة على شقاها ماتتميزرش ويحطها تحتو باش ماتطلعش عليه مي حنا لازم نكونوديما توpـ ابسط حاجة باش ديرها ماشي لازم غيرا جازت عليه وعلى لادوان -عجوزتها -باش تروح للحمام كي تكون يقيمتها وشانها ماتكسرش راسها حاجة لي ترشقلها تجيبها اقتباس وبغير نقل شحآل تحكم ؟! مآ حبتلوش أونكوغ المهم كل مرة يعسرلهآ بآش تبطل هههههههههه يصعب فيها باش تمل والله صادفت شحال من حالة في هاد cas توجوغ تسوفري باش تكمل وتتهنى وهو مالـgـري pـرومالها مي ديفوا الوعد يجيه كي سكر في الما يدوب بفيه يكلخلها بيه غير باش تتزوج واحد نعرفو غير تزوجت بيه قالها انساي واش وعدتك خصك غير قراية كي تخرجي نتيا م دار شكون يخدم على يما لتماك تندم على نهار لي خممت في زواج تولي راجل يحكم ماعندهاش لي شوا لي كانو عنده قبل ماتغلط اقتباس بقآت صآمدة حتى جآ نهآر وتقلبت فيه هيآ قآللهآ بآي بآي يآ بنت النآس ورآح التفرفيط تآعهآ مي هي عالأقل طيرت قرآيتهآ نستعرف بيها الصح كي كملت قرايتها تندب وتحدب على راجل كيما هدا الله يقطعو والله لا يشوفنا فيه تهنات منو دوكا تخرج تخدم على بنتها بالشان هو كي يكون في الحياة واش م فايدة غير صداف ومشاكل اقتباس ووحدة أخرى تزوجت بعد وبطلت لقرآية ودرك كي نتلمون حنآ لي جون في الكل بالحطة واللبسة وهي مع ولآدهآ عندهآ زوج أي ترضع في هذآ ورآهي تحط ليكوش لهذآ بلآ التبهديلة لي عليهآ وشعرهآ لمكشّب مي مآ حآيبآش تقر بلي عيآت وزربت روحهآ ماتقدرش تستعرف تحشم قدامكم مالـgـري مداخل راهي نادمة 100 ونضمنهالك مي توجوغ تبينلكم راهي فور ولاباس بيها ماعليش كل واحد واش خير وكل واحد واش ربي كتبلو اقتباس أنآ عن نفسي ديمآ حطيت الزوآج في رآسي كمكتوب وكآن كآتبلي رآني نتزوج مآم بعد مآ نكمل قرآيتي ولوكآن بآلي في الزوآج كنت تزوجت كي كنت نقرآ ورآني بولآدي درك مي لقرآية أهم زين لكلام هكدا رانا كي تكمل القراية يجي تخمام فيه اقتباس هك الطفلة تقرآ وتتحقر يآ حتي بلآ قرآية يذلهآ رآجلهآ غدوة يقوللهآ الجآهلة وصرآت قدآم عيني وسمعتهآ بوذني الكلمة هذي هدرهّآ وآحد لمرتو حتى بكآتجآتهآ طيحة قدآمي ألوغ العلم مليح والزوآج مليح من بعدو ومآلآزمش تأمني ياودي الراجل مهما يوعد وديما يحب يرجع لمرا تحتو باش يحكم ويتسلط فيها كيما يحب وتوجوغ يخير وحدة جاهلة وماشي شايفة دنيا باش يطيح من قيمتها اقتباس أمآ لي مآ قرآتش من اللول وحبست بكري أفضللهآ تروح تتزوج مآ عندهآ علآش تقعد في هدي راني معاك هم مانجحتش في قرايتها وتزيد تشد روحها تتزوج خير ويا جماعة ماناش كونتخ زواج لي تكون تقرا اكيد تفهمنا اقتباس كآنشي حوآيج خلآف نتفكرهم عالسـuـجي هذآ رآني نجي نعبّر عبري براحتك راهو غير ليكم *********** اقتباس بالنسبة لموضوعك ايمانو انا نساندك 100/100 عشت المرحلة هادي لي راكي فيها وفتها وشفت النتائج قدامي لبنات لي مكملوش قرايتهم وتزوجو في وسط لقراية وقتها لقاو الدنيا تزهيلهم غوب وراجل ودلال واحلام وردية بانتلهم بلي راهم حاجة ايه مالوغ تبانلهم راهم حاجة ويحسبو رواحهم عليك يرجعوك نتيا جيحتي كي خيرتي قراية تقولك لالات البنات راهم بولادهم ونتيا اقعدي مع قراية لي في لافان تكمل عليك في الدار بلا خدمة هنا نقولهم ماعليش ليسونسيال قريت وواحد مايطيح من قيمتي اقتباس قراو معايا بنات هك وينوضو يتفاخرو زعم هيا اتزوجت وهي تقرا وانتي مازالك تقراي وبلا راجل في اللحظة هاديك تبانلها مليحة مي بعد مايفوت الوقت تجي تشوف تلقى عمرها راح بين البيدون والنشافة ولولاد والراجل ترجع كيما نقولو بونيشة عالمها محصور في جانب واحد . ياودي زواج gـاع تقلاشو عام لول منباعد تولي لاغيسـpـونسابيليتي ودراري مايكونش حتى ليها وقت لروحها تجري غير مور شغالات البيت اقتباس انا كونتر وحدة تخلي قرايتها وتتزوج الطفلة تقرى تجيب ديبلومها وتخدم تضمن بلاصتها والزواج ماش راح يهرب عليها اكيــد بالنسبة ليهم راح يهرب اقتباس بالعكس كي تعود بخدمتها وقيمتها راح يتمناها ألف واحد وهيا لي تعود البالون في يدها تقبل بلي يعجبها ماش تدي برك تقول راح تبور. والله صح تولي هي لي تخير بمن تتزوج ودوكة ولاو ليجون هوما يحوسو غير على خدامات ولي بديارهم باغسكو الوقت لي رانا في صعابة لمعيشة لازم معاونة فيه باش يقدرو شوفو ليجوغنو تفهمو خدامات شحال راهي لادوموند عليهم اقتباس نصيحة مني للبنات: اقراو قرايتكم واخدمو تشوفو الدنيا وتكوّنو شخصيتكم باسكو الحياة بعد الخدمة حاجة مختلفة بزاف على لقراية تاع الجامعة مُخك راح ينضج تفكيرك راه يتطوّر وبزاف حاجات تكتسبيهم . كيلعادة شوشو ترشقنا بكونساي خارجة من وحدة مجربة ومزيان داك لعقل ربي يتبتك على طاعتو يلعزيزة *********** اقتباس يعطيكــ الصحة إيمان بلامزيتي حبيبتي انا لي عليا حابة نوصلو الفكرة ونمدو النصح والعبرة لباقي لبنات مايطيحوش في نفس الغلطات اقتباس هذا هو التخمام لي راهو عند لبنات في هذا الوقت سيرتو اذا كان عندها خوها و متالبها تقولك اللول لي يجي يخطب نقبل بييه ياودي مابيهم ني خوهم ني باباهم هوما كي يحرنو ع زواج ويشوفو بنات تزوجو تقولك نتزوج ونتهنى كيما لخرين ياك لبنات يموتو ع معاندة لي شادها خوها هي تان تحرن ع قراية وكي تكملها تقولو زوجني بمن حبيت مدامها ناجحة وماجيبش ليـpـروبلام خوها مايديرلها والو كي تكون شادة روحها اقتباس على حساب قرايتها و مستقبلها ماعلبالييش من واش خايفا اذا خايفة تبور ياك كلش بالمكتوب و لي مكتوب على الجبيين تعيا و تشوفو العيين ايه ولي ولاو أرملات وهوما صغارات زعما خايفة تبور امالا ولات أرملة كيفاش تهرب منها الوحدة لازم تصبر ودير لي عليها مدامك في عز شبابك اقراي وخممي في مصلحتك وpـلاسة تليق بالتعب لي جوزتيه منباعد يجي راجل تالي هو يحوس عليك خلي لروحك قيمة ماترميش روحك غير لي يجي تقبلي اقتباس اتكملي قرايتك و بخدمتك و طموبيلتك افضل ملي تتزوجي و انتي عندك 18 و لا 19 بلا نيفو لا والووو و يولو يعايروك يخيي دركا بخدمتها و متسلكش ماشي حتى لا قراية لا والوو صح وقتنا تبدل بكري كانو يتزوجو صغار باغسكو عندهم مام نيـvـو بصح دوكة طورنا رانا نزيدو نتقفو مليح لينا العلم يوريلك صوالح جدد اقتباس كيما وحدة صحبتي عندها خوها أخينا و نهار جابت البيام مخالهاش تطلع لليسي بسييييييف باش خلاها طلعت لليسي و قاللها حتى و اذا كملتي في الليسي و جبتي الباك الجامعة غيير متطمعييش اومبعد في العام لي جوزنا فييه الباك جاوها خطابة و هذا لي جا خطبها قاللها اذا جبتي الباك كملي قرايتك معنديش مشكل حتى بعد الزواج و هي مجابتش الباك و عسسنا فيها عاودي الباك بلاك تجيبييه و تكملي قرايتك قاتلك لالا درك خلاص راح نتزوج انا واش نديير بالباك جايحة لوكان عاوداتو على بالي خو يهدر مي منباعد كي يشوفها عاقلة يخليها تكمل كامل يحوسو على لاvـونـuـغ لي ماقراوش راهم نادمين وتحكمهم الغيرة كي يشوفوك تقراي تلقايهم شادين الدار مع تسياق ماسلكوش مغسي حبيبتي شاركيتينا بردك لي يفيدنا iméne09

اقتباس المشاركة الأصلية كتبت بواسطة Moon_light حبيت نزيد نقول كتوضيح برك لتجنب الفتآوى , أنآ مشني ضد الزوآج ولآ أحرض على التمرد ورفض الزوآج , بحجة الدرآسة والعمل , مآ تهمنيش الخدمة قد مآ تهمني لقرآية , لأنو رآيح يجي البعض يقولك يعمروآ في لبنآت , بآش يقرآو ويخدموآ وتبدآ الفتآوي ونرجعوآ في أم يحرضوآ على الفسآد , حتى ربي قآل اقرأ والدرآسة للرآجل ولمرآ , أنآ كملت قرآيتي ومآم نتزوج رآيحة نعآود نقرآ قرآية خلآف , زالعآم الجآي ان شآء الله نفوّت البآك في تخصص آخر , ونقرآ تخصص آخر , وان شآء الله نموت وأنآ طآلبة علم , ولوكآن يخيروني بين لقرآية والزوآج نقول لقرآية , وطحت في موقف المُختآرة وخيرت لقرآية , ونزيد نخيرهآ ان شآء الله , يعني خلآصة القول أنو حنآ هنآ مآذآبينآ لبنآت يقرآو , ولي كآتبهولك ربي تديه رآكي تديه مآم بعد قرن , هذآك أو مآ ينحّيهولكش الطبيب , هكذآ بآش نوضحوآ كلآمنآ لتجنب أي لبس في الموضوع , ولي تحب تتزوج هي حرة في خيآرآتهآ , احنآ نحكيو وآش رآنآ نشوفوآ كمجتمع أنثوي , معظم بل الأغلبية لي تزوجت وفرطت في قرآيتهآ ندمت , والعبد يتعلم من تجآرب غيرو تآني , ومغسي أونكوغ إيمآنو , سلآمي ’ Moon_light

اقتباس المشاركة الأصلية كتبت بواسطة iméne09 اقتباس حبيت نزيد نقول كتوضيح برك لتجنب الفتآوى , أنآ مشني ضد الزوآج ولآ أحرض على التمرد ورفض الزوآج , بحجة الدرآسة والعمل , مآ تهمنيش الخدمة قد مآ تهمني لقرآية , مام هدرت عليها تاع الصح زواج سنة الحياة ولازم تكملي نص دينك بيه مي رانا نهدرو ع العلم حاجة واسعة على جالو نحبس حياتي لتم اقتباس لأنو رآيح يجي البعض يقولك يعمروآ في لبنآت , ههههههههه عجبتني هدي حنا مجرد نمدو عبرة وديكونساي لي حبت دير بيهم هي لي راح تربح يعني حنا ماعلينا غير بلغنا ولي ماحبتش كل واحد حر في حياتو ماناش نفرضو في راينا عليكم حبينا نوصلولكم فكرة انو زواج وراجل مايهربش مي الوقت راهو يجري ادا خيرتي زواج راح يكمل غير ب دراري ودار ماتقدريش تقراي اومام تون مع دار ماتلحقيش زينة لعقل كملي في غرضك ولي حبك يدير pـوسيبل باش يسناك ادا كانت تهمو مصلحتك اقتباس بآش يقرآو ويخدموآ وتبدآ الفتآوي ونرجعوآ في أم يحرضوآ على الفسآد , حتى ربي قآل اقرأ والدرآسة للرآجل ولمرآ , اكيـــد اطلبو العلم حتى ولو في الصين اقتباس أنآ كملت قرآيتي ومآم نتزوج رآيحة نعآود نقرآ قرآية خلآف , والعآم الجآي ان شآء الله نفوّت البآك في تخصص آخر , ونقرآ تخصص آخر , ربي يكملك في واش في بالك حبيبتي اقتباس وان شآء الله نموت وأنآ طآلبة علم , نتيا فور شريكتي مدامنا حايين وبصحتنا شونس لي تجيك تاع قراية ماترونديهاش راح تنفعك في المستقبل اقتباس يعني خلآصة القول أنو حنآ هنآ مآذآبينآ لبنآت يقرآو , ولي كآتبهولك ربي تديه رآكي تديه مآم بعد قرن , هذآك أو مآ ينحّيهولكش الطبيب , هكذآ بآش نوضحوآ كلآمنآ لتجنب أي لبس في الموضوع , ولي تحب تتزوج هي حرة في خيآرآتهآ , احنآ نحكيو وآش رآنآ نشوفوآ كمجتمع أنثوي , معظم بل الأغلبية لي تزوجت وفرطت في قرآيتهآ ندمت , والعبد يتعلم من تجآرب غيرو تآني , هداك هو الصح ومقصودنا درنا لي علينا وباقي عليكم iméne09

كل وحدة ومكتوبها وواش تخير هي لي مسؤولة عليه بعد ماطيح فاس براسماتنفع ندامة
حنا كملنا نقاشنا وكنا gـاع في نقطة وحدة ورانا نبازيو ع قراية يالغاليات
ربي يدوم عقلكم ونفكرحو معاكم في عراسكم ماعليكم يلعضوات شاطرات
غير تزهيونا برايكم

مكاش كيفاش تخلاص حكاياتنا بلا ....
كــــلام مــوزون مــن فمــي متقــــون
قرايتـك دايمة وغير هي لي تنسي لهـمـوم ولجـــــراح
زواج يسناك مي لحياة راهي تجري غير العلم لي ضاوي كمصباح
اقراي وخممي في لاvـنـuـغ ربي من عندو يبعتلك المفتـاح
لتماك القلب ينشرح ويبان المكــتوب بـلا تمـــــزاح

صحـيتو شريكــاتي ربي يدوم عليكم لفـــــــراح

سلااامي

©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©