عنوان الموضوع : حكايات بنات الطبعة الثانية - العــدد الأول- عالم حواء
كاتب الموضوع : chichaki
مقدم من طرف منتديات ايمازيغن



أهلا لبنات الزينات لحلوات

معاكم تحلا قعدتنا

جيناكم اليوم مع عددنا الاول لهذا العام

علبالي كامل تستناو فينــ

سمحولنـــ ولا طولنا عليكم





خيّرنا في هذآ العدد نحكو
على طآعة الوالدينـْ
ربْنا يخلّيهملكم ولا يحرمكمـ منْهمـ
انـ شآء الله يآربــــــ

ضيفتينـ خيّرناهم يشاركونآ ليــوم
ويحكولنا على مواقفـ سمعــوها
و عـــاشوها ويعطونا رأيهم


نرحبـــو بيهـــم



اقتباس
المشاركة الأصلية كتبت بواسطة mlina4algeria

أهلا فرح سعداء كونك قبلتي الدعوة
وشرفتينا اليوم لموضوعنا
إن شاء الله تكوني بتمام الصحة و العافية
رح نديرو قعدة خاصة على الوالدين ركي واجدة تشاركينا برايك ؟


اقتباس


وعليكم السلام ورحمة الله وبركاته
وانا اسعد لاني ضيفة عندكم
صحتي بخير والحمد لله على كل حال بوركتي
يشرفني ويسعدني دعوتكم لي موضوع بالغ الاهمية وفي نفس الوقت رائع
رائع ومهم رائع ومهم رائع ومهم ......الى ما نهاية
رح نديرو قعدة خاصة على الوالدين ركي واجدة تشاركينا برايك ؟
اكيد وبكل سرور سعيدة جدا وزدادت سعادتي اكثر بالموضوع لانه
يتكلم عن الوالدين


شكرا فرح بوركتي غاليتي


أميرة كيفك يازينة أهلا بيك انت ثانيك
لموضوع ديالنا خيرناك ضيفة معانا
وفرحنا كي قبلتي دعوتنا
أهلا بيك

اقتباس

وفيك اهلا بارك الله فيك فلة ختي على الدعوة
وان شاء الله نكونو فالمستوى ونفيد اللماويات




شكرا أميرة بارك الله فيك يازينة








أعزائي اللمويـــات

نبدى نحكيلكم لحكاية الي صرات معايا و نرجعو نحكيو بعدها

هذي وحدة صحبتي تحكي على اختها الكبرى

هما في 3 بنات في الدار وحدة في الجامعة تجي غير في الويكاند

و لكبيرة كملت قرايتها في الجامعة و عاطلة عن العمل

راحت تدير فورماسيو تنفع بيها روحها

والي بقات رهي صغيرة تقرا في السويام

معروف ان امهم تخدم عليهم المسكينة نهار كامل برا و تكمل شغل الدار تالمو مكانش الي يساعدها تظل ديما تشكيلي على ختها الي متحكيش مع أمها

ديما تتقابض معاها و تسبها و تقوللها انت الام وان تالي تقومي بينا

يعني هي كي تدخل لدار تلقا كلش واجد

هي أمها الي تغسللهم حوايجهم تطيبلهم تخدم كلش برا و في الدار

قالتلك تظل مع الميكرو تكونيكتي و تلقا الاكل واجد ايماجينيو درك معايا

و كي توجدلها امها لعشا وجهها صحيح تروح تاكل

و مش هذا برك حتى تقوللها منغسلش لماعن غير نهار بالنهار

يعني تدير الدالة مع اختها الصغيرة حتى هذيك و طمعت فيها

قالتلك من كثر لعياط ولات امي تسكتلها و تديرلها رايها غير باه ميسمعوش الناس صوتها و هذي صحبتي كي تجي تحكيلي تبكي تقولي منقدرش ندير والو

و نخمم نخرج من الجامعة باه نكون مع أمي كل ما تروح لدار تبقى امها تبكي وتشكيلها و رجعت وين تقوللها ليماها هكي انت كذا و كذا ؟؟؟

الله يستر على بنات هذا الوقت

برك منقدرش نحكيلكم كلش نزيدلكم هذي برك رجعت حتى تقوللها ليماها

هاني نوكل عليك ربي ؟؟

يا الله ياكريم




نوجه هدرتي ليكم ياحباباتي اللمويات
الوالدينـ هوما كلّش في هاذي الدنيآ هوما اللّي ربّونا وعلمونا

وهذا يكفي بالنسبة لينا
بلاما نذكرو الي داروه كامل في حياتهم علينا
واآشـْ نجازيوْهم مايكفيشـ

وشفتو هذا جزء صغير ملي راه صاري للولدين في وقتنا هذا

فرح ليـــك الكلمة تفضلي واش رايك ؟؟

اقتباس
المشاركة الأصلية كتبت بواسطة فرح بسكرية
انا نشوف ظاهرة عصيان الوالدين او شتمهم ظاهرة متواجدة بكثرة
اقتباس

إيه يا فرح أختي رهي متواجدة و بزاف كما قلتي و رجعنا نخافو حتى نسمعوهم
و ما ادراك نشوفوهم
تفضلي كملي هدرتك ختيتي



أنا سمعت بزاف وشفت بزاف ابناء يشتموا يماهم ولا باباهم صراحة نستغرب ; سبحان الله يجود اناس يتمناو تكون عندهم ام او اب يتامة مساكن معندهم لي حن عليهم ولا لي يوقف معاهم ,وناس تلقاهم الحمد لله عندهم نعمة كبيرة لي هي الاب والام ومش مدايريلهم اهمية
اقتباس

ايه يافرح هاكي قلتيها و في هذي الدنيا نشوفو لعجب
المحروم يبقى محروم و الي عندو هذي النعمة قليل برك الي يعرف قيمتها
و كما يقولو غير كي تفقديها تحسي بقيمتها


نحكي على روحي انا عن نفسي عمري لا نتجرا ونرفع صوتي على والديا ولا نشتمهم استغفر الله ولا نعصيهم انا هما عندي بالدنية ومافيها
انا كنحكي معهم منرفعش حتى وجهي ونخزر فيهم كفاش نتجرا نعصيهم مستحيل

اقتباس

الله يكثر من مثالك
اسمعو يالبنات هذي لهدرة من فروحتنا ره قلال هذو لعباد درك
انا عن نفسي نزعف والديا صح امور بسيطة لاكن نرجع نندم عليهم و نقول علاه متحكمتش في روحي ربي يقدرنا نرجعولهم خيرهم علينا و لي درناه قليل



احنا لبنات او الاخوات عامة سعات نداوسوا مكانش وحدة متتلاسقش مع ختها هه هو مهوش ضرب لاسمح الله وانما ارتفاع الاصوات احيانا تكون على ستيلوا هه لبسة هه ..الخ

اقتباس

عادي يافرح أختي هذي الامور تصرا في كل دار ايه حنى كي يبدا لعياط
وحدة فينا تجري تسكر الطويقة سينو يسمعولنا لجيران
و تبدى أمي تسكت فينا و تقول بهدلتو بيا هذا نشوفو امر عادي حنى الجزائريين عندنا طبيعة وحدة
ايه كملي



كانت سعات ماما تزعف من هذا الشيء وانا ومنقدرش على زعاف ميمتي والله لعظيم منرتاح حتان ترضى عليا ;وانا نتمنى يارب يارب يخليهملي وان شاء الله تكون نهايتي قبل ماندير شيء يهينهم ولا يمسهم بشيء مستحيل يصرا هك باذن الله

اقتباس

أن شاء الله يارب و ربي يطول في عمرهم


ايا كدخلنا في هذ الموضوع راح نحكى على واحد وليد جارنا هو ولد مشاغب بزاف لامداير احترام لوالديه ولا للناس كان يضرب يماه مسكينة وساعات نسمعوا صراخها في دار تغيضني ربي يهديه تعبها
بزاف وهانها مخلى مايدير

اقتباس

هاي لحكايات الي لحمنا يتشوك عليهم و كما قلت من قبل يافرح الامور لصغيرة لي يفوتو علينا في الدار
تكون عادية و لوالدين حتى ولا تقلقو شوي نورمال مي هذي تسبب بمرض مش بقلقة برك
هذي أمو الي جابتو لدنيا يديرلها هك واش بقا يعني الله يهدينا وخلاص
قوليلنا على يماه المسكينة كيفاه كانت تدير ؟؟ كملي كملي


ايه يماه مسكينة هي ساعفاتوا وحاولت معاه هو كبر وعرف صلاحوا بلاه ربي بمرض ,شفتوا ربي
سبحانوا المهم هو كمرض شكون لي وقف معاه اكيد يماه وقفت معاه سهرت معاه كانت تعمل كل شيء تغسلوا تنظفوا ....الخ

اقتباس

هذو هما الوالدين و خاصة الأم مهما تسمع و مهما تعيش تبقى ديما صابرة و أي حاجة تجي في كبدتها تلقايها كي الطير هنا و هنا يا سبحان الله فرح واش كان مريض ؟



هو صح مرض بصح كان يحكي لاباس بيه وشيء لي ستغربوه ناس انوا كمرض مكانش يحكي مع انوا لاباس بيه كان سعات لجيران يزروه يبقى غير يبكي مع مرور الوقت شفاه ربي سبحانوا شوفوا قدرت الخالق مع انوا لي يشوفوا يقول معادش يعيش وكل يوم يقولوا هذا اخر يوم يعيش فيه.

اقتباس

كان ميهدرش ؟ الي يسمع حكايتك يوقول راه ربي عاقبو و خلاه عبرة للأخريين
الله يسترنا في هذا الزمــان و الله رنـــا طول مقصرن في جيهتهم
شفتي رجع يستنى مكتاه يموت



لقصة مؤثرة فيا
اقتباس

راهي اثرت فينا حنى ثانيــك رني نتخايل في يماه المسكينة أنا هذو لحوايج يقطعولي قلبي



المهم هو الحمد لله شفي تماما رجع ندم على واه كان يدير ليماه كان لاخدمة لاوالوا غير ضايع هكاك هو كرجعتلوا صحتوا دار عرضة يعني عزم ناس للعشاء وناس ستغربت مع انوا لكان يحكي معاهم ولا مقدرهم

اقتباس

ايه و نداما تجي ديما في لافـــ
مليح كي ستعرف بغلطتو قبل مايجي نهار وين يكون وحداني
معنتها عزم الناس وهو ميحكيش معاهم بلاك كان ناوي يصلح غلطتو ؟؟
كملي



كي عرضهم كامل راحوا حتى ابي كان هناك وشيء لي داروا في هذاك اليوم واحد مقدر ينساه لي هو حرق يديه لي ضرب والدتوا بيهم لي هانها بيهم هدا كل باه تسامحوا ميمتوا مع انها مسامحاتوا مسكينة وعمرها لاشكاة لواحد كانت دايما تطلب هداية لوليدها وكان ربي سبحانوا هو لي مقويها.

اقتباس

يا الله مستنيتش هذي النهاية
لحمي تشوك هذا عرف أنو غلط غلطة كبيرة عليها كانت ردة الفعل ديالو هك
فعلا هي عبرة للأخريين


انا نشوفها قصة مؤثرة ومقدرتش ننساها مع اني كنت صغيرة هذاك الوقت.

اقتباس

معلبالكش انو هذو القصص عمرها مايقدر واحد فينا ينساها عليها قلتلك هي عبرة للأخريين
لانو قلال الي يدير كما هو وقلال الي يستعرفو بغلطتهم



وانا شفت بزاف بنات ثاني يعصوا والديهم نقللهم راكم غالطين ويجي نهار وتتفكروا واش درتوا وخلي على غضب ربي وربي يهدينا جميع

اقتباس

عندك الحق ياختي فرح
غضب ربي راه صعيب
ولازم على كل واحد فينا يخمم قبل مايتجرأ يرفع صوتو على أمو ولا باباه
يعطيك الصحة يافرح على هذي لحكاية و كلامك الزين
خليتينا يوم نعرفو نوع من لولاد لي يستعرفو بغلطتهم ويعاقبو روحتيهم على جال والديهم
هذا عرف قيمة أمو صح و عرف أنو غلط غلطة كبيرة
فرح كلمة أخيرة توجهيها للي يقراو كلامك هذا


حبيت نوجه رسالة لناس لي غالطة في حق والديهم نقللهم اصحوا الوالدين واحد ما يجي في بلاصتهم نقللهم تفكروا برك الايه هذي
بسم الله الرحمـن الرحيـم
﴿وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلاَهُمَا فَلاَ تَقُل لَّهُمَآ أُفٍّ وَلاَ تَنْهَرْهُمَا وَقُل لَّهُمَا قَوْلاً كَرِيمًا وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا﴾


هذي توصل لي كنت حابة نوصلوا صدقوني هما يصبروا عليكم وبلاك حتى ينساوا ويسامحوك بصح يبقى جرح يبقى
ان شاء الله ربي يحفظلي ميمتي وبابا ويبارك فيهم وفي عمرهم وان شاء الله ندي دعوة لخير ليا وليكم جميع
ونقللكم تهلاو في والديكم وكل واحد يجتهد فينا في بر والديه ولواحد ميعرف شحال بقالنا ولا بقالهم من العمر
وفي الاخير البر ثم البر حنا منعرفوش وقتاه نفقدوهم

أللهم اعنا على طاعتهما والبر باحسانهما اللهم امين


أمين يارب العالمين
يعطيك الصحة يافرح
كلامك زين و معناه كبير
القعدة معاك كثر من حلوة
الله يخليك لوالديك و ربي يمدلك ماتتمناي





نكملو قعدنــــ
مع أميراتنا لحلوات
و نرجع ليك أميرة تفضلي ختيتي
راه ليــك الخط



اقتباس
المشاركة الأصلية كتبت بواسطة ÀmìR@RøRø

بارك الله فيك اختي فلة وفطوم على مجهوداتكم
لا ريب أن بر الوالدين من أهم الفرائض ، ومن أعظم الواجبات ، والله - سبحانه وتعالى- ذكر ذلك في مواضع كثيرة من كتابه العظيم ، مثل قوله سبحانه
الأية الي سبق وقالتها أختي فرح



اقتباس
وفيك بركة أميرة
صح ربي سبحانو هدر على الوالدين و بين لينا انو مكانتهم بزااف كبيرة


طاعة الوالدين واجبة على كل فرد صغيرا كان ام كبيرا ولكن مع الاسف نرى عكس ذلك تماما
الوالدان، اللذان هما سبب وجود الإنسان، ولهما عليه غاية الإحسان..
الوالد بالإنفاق.. والوالدة بالولادة والإشفاق..
وأنا أقف في حيرة ..
مالي أرى في مجتمعاتنا الغفلة عن هذا الموضوع والإستهتار به..

اقتباس

أيـــــــــــه يا أختي أميرة
رح تبقاي تستغربي
شفتي واش حكات فرح أنا حتى شوكاتني
وهذا قليل من حكايات الي رهم يصراو
في كل جيهة من بلادنا
كملي ياختي كملي



أن أعظم صحبة للإنسان هي صحبة الوالدين ، وهى صحبة يرضي بها الإنسان ربه ويرجو بها حسن الثواب في الآخرة
ربي يهدينا جميع لما يحبه ويرضاه

اقتباس
اللهم أمين
وي عندك حق هم صح أعظم صحبة للإنسان
قوليلنا أميرة أنت أكيد فاتو عليك قصص
خلينا نستفادو منها أنت ثانيك و حكيلنا واش عندك


كاين قصص كثيرة ومتعددة عن هاد الظاهرة لي راها متفشية في مجتمعنا
وهادي قصة على وحدة نعرفها كانت جارتنا.

كانت هدي جارتنا مسكينة كبيرة فالسن وعندها زوج بنات وزوجها ميت تعبت على هاد لبنات وكبرتهم بصح كامل الشي لي دارته ما نفعش فيهم ولاو كامل ما يستعرفوش بيها وخرجولها (مسوفجات)


اقتباس

رني بديت نتخايل لحكاية
خاصة كي تكوت الوالدة بلا والي
و ترجع هي المسؤولة الوحيدة على دارها هنا تكون مسؤوليتها ضعف


مداك مكانش الراجل لي يزير وهي مسكينة كانت تخدم عليهم بسكو هوما على اساس كانو يقراو كانت تخدم فالمؤسسات منظفة غير باش توفرلهم لقمة العيش وهوما يزيدو يتقلشو عليها ومسكينة على كبرها تخرج تسوق فالبرد وفالشتا وهوما قاعدين فالدار وكل وحدة شادة تيليفون وتحكي
اقتباس

مسكينة و أكيد هي همها الوحيد توصل لقمة العيش لدار
و تستر بناتها خاصة كي جاو بنات
يا حليلها هذو لبنات يقراو ؟؟؟


بزوج حبسو قرايتهم وكل يوم برا يدورو ربي يعلم وين كانو يمشو
مرة قاتلنا تقلقت عليهم وانا خايفة وسهرانة حتى 2 تاع ليل
اقتباس

أو 2 تاع اليل
مي هذو قراااااف ؟؟؟
مسكينة أمهم هذا هو جزائها


gارات طونوبيل عند الباب حطتهم ومشات ومين سقسيتهم طارو فيا وحبو ياكلوني


اقتباس

إنت ستنيتي يحكيولك زعمـــا
هم أكيد واضحة وضوح الشمس وين كانو
تبقى أمهم هي الضحية الوحيدة في هذي لحكاية متستاهلش والله


هي مسكينة مداك كبيرة ماتقدرش تدخل معاهم في نقاش تسكت وتخليهم وتقولهم نوكل عليكم ربي
مسكينة كانت ملي تجي وهي تحكي تعاود تقولنا سمحولي مصبتش لمن نفرغ قلبي

اقتباس
ايه كان مش نتوما الي كانت تفرغ ليكم ممكن تهبل
ولا كاشما يصرالها


جا نهار لي ماتت مسكينة ربي يرحمها ومشاو ماما وخالاتي يعزيو قالونا تحسب ماهم كامل ماشي ميتة يتمسخرو ويضحكو نوووورمال

اقتباس

الله أكبر
الله يرحمها
و لهذي الدرجة علاه يعني معندهم ولا ذرة أخلاق و لاأحاسيس
ياسبحان الله من بعد واش صرا معاهم
؟


هادوك لبنات داهم خالهم يسكنهم عنده ربي يعلم واش راه صاري فيهم دروك
اقتباس

ولا كان أمهم و محسوش بيها
و قتلوها وهي عايشة و كملو عليها حتى راحت الروح ديالها
كيفاه تحبي رح يكونو أكيد رهم يخلصو ربي يهدي ماخلق
يعطيك الصحة يا اميرة فعلا حكاية يقشعر لها الابدان
وصلنا نختمو عدد اليوم
نصيحتك لبناتنا ياأميرة


نصيحة لكل بنت
الدنيا فانيا ويلا بغيتي الدنيا تعطيك قيمة تهلاي بزاف فالميمة باش تنجحي في حياتك وخير الصحبة صحبة الوالدين وباش تنالي دعوة الخير
وربي يجازيك على على كلش درتيه معاهم



يعطيك الصحة ياأميرة
على النصيحة لكبيرة
الولدين هم الساس
و لو خلاونا نكونو كي الدار بلا حيوط




يعطيكم الصحة يالبنات
قعدتكم سكر و كلامكم عسل
قلال لي يخمو كيفاكم
وقلال لي يعرفو قيمة الولدين
ياريت نتعلمو من هذي الدنيا
يريت نتعلمو من اخطاء الاخير
باه نعوضو على ولدينا في دنيتنا قبل مايروحو علينا
ويرجع الندم يدور بينا و نقولو ياريت مزالهم معانا ولو يوم
نفرحوهم و نطلبو منهم السمح و الرضا علينا

هنا كملنا هدرتنا يا حباباتي
نعتذر من غياب اختي فاطمة
كنا نزيدو نستفادو منها هي ثانيك

كلمتي لحباباتي

والديك ثم والديك
مهما سمعتي و مهما قالو ومهما دارو
اعرفي انو ربي هو الي يجازي و هو الي يعاقب
انتي مهمتك هي الطاعة و تحوسي تربحي رضاهم الدنيا قبل من الاخرة


هنا نكون كملت قعدتي معاكم
ستناونا في العدد الثاني
ان شاء الله نكونو قدرنا نوصلولكم المغزى
نستناو مشاركتكم معانا
متبخلوش علينا بكلامكم الزين
و السلام عليكم و رحمة الله و بركاته


الموضوع من إعدآد وتقديم :
FATIMA 19 و mlina4algeria
تصميم : ¬Đỉaмơŋđ ✿
برعـــايــة :مجموعة عالم المرأة






©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©