عنوان الموضوع : اليكم قصتي في انقاص وزني دون ريجيم صحة نسائية
كاتب الموضوع : admin
مقدم من طرف منتديات ايمازيغن

مرحبا بيكم اول حاجة باركولي على النجاح في الخرجة من خانة صاحبات الوزن الزائد الي كنت محبوسة فيه 16 من عمري
طول عمري نخاف نوقف على الميزان من الصدمات الي ديتها منو كنت نسخف على البنات الي عندهم طاي حوتة (طاي مانكان كيما نقولو) وديما كنت انا السمينة فصحاباتي جامي حوست على لبسة ولقيتها قدي ديما نسوفري حتى نشبع باش نجيب حاجة تاع النسا الكبار ونتمرمد معاها عند الخياطة باش ترجع قدي كنت نتمرمد تمرميدة كلاب سييت الريجيمات بصح ما قدرتش علابالكم في بلادنا ماعندنا حتى ماكلة صحية غير العجاين والقازوز والخبز الي هو اكبر مشكل تاع السمنة
لهذا يا البنات قررت نحارب ونواجه الواقع المرير كي بديت نخمم طلعت هبطت لقيت روحي شربت القارص شربت التاي شربت الي يتشرب والي ما يتشربش والو كلي نصب الماء فالرمل درت لروحي نظام غذائي تاعي انا واحد ما يدخل فيه
العام الي فات كان عمري 16 وطولي 1.68 ووزني 75 كيلو ويطلع بكيلو ولا زوج يعني غير مستقر درك نقولكم على هادا النظام:

فالفطور نشرب حليب مع حاجة خفيفة بسكوي ولا قاطو حبة ولا زوج برك وما تصدقوش الاطباء الي يقولو الفطور هو الاهم ولوكان ما تفطرش ما تنقصش وزنك صح الفطور مهم باش تبدى نهارك بصح كاين الي يفهموها بلي ياكلو حتى يتنفخو فالفطور ويستناو رواحهم ينقصو هو الفطور يخلي عقلك ما يحسش بالمجاعة باش ما يحبسش السكريات وما يحرقهاش يعني حيز تدخل شوية ماكلة للمعدة خلاص ماكلاه تكثرو
فالغداء نتغدى كيفي كي الناس بصح ما نكثرش الخبز وما نشبعش للخر وبين الفطور والغدا ناكل حاجة ما عنها حتى معنى بصح صحية كيما علبة ياوورت ولا تفاحة ولا ندير عصير بكاش فاكهة عندي فالدار وما نحطش فيها السكر المهم اي حاجة تشبع بصح مافيهاش النشويات وبشوية وليت وحدي نشبع كي ناكل شوية وحتى كي وليت ناكل اكثر ملي موالفة نحبس ما ناكلش خمس سوايع ولا اكثر ونشغل روحي بالتفراج ولا بالانترنت ونشرب الماء حتى تتعمر معدتي
فالعشية نشرب حليب وناكل تاني حاجة خفيفة وساعات نكافأ روحي بحبة باتيسري كي نطول ما ناكلش
وفالعشا ما ناكلش العجاين كيما المقرونة والسباكيتي ناكل السلاطة بزاف ونهز قطعة صغيرة من الخبز ونحاول ما نكملهاش للخر
ووليت نحس روحي نشبع تمتم والعشا نتعشى بكري يعني على السابعة ما نوخروش باش ما نرقدش ومعدتي تهضم وتتخبى هدوك الدهون وما تتحرقش
تاني نقصت الشوكولا الي كنت عايشة بيها وتعلمت نقول لا كي تعطينا ماما كاش حاجة ماشي صحية تاني تعلمت ما نكملش الصحن حتى للخر كي نحس روحي ما نقدرش وهذي تاني عادة سيئة زرعوها فينا والدينا كي كنا الصغار هي لازمك تكمل صحنك للخر ولا ما تنوضش من الطابلة وهي عادة ماشي صحية خلاص ردو بالكم ديروها مع ولادكم
هكا اتبعت نظام كان قاسي عليا شوية فالاول بصح مبعد والفت وولى كلي طبيعة فيا ووحدي نقصت الحوايج غير الصحية
وساعات ناكل حوايج شوية ضارة مرة فالفال كيما الشيبس ولا المقلي يعني كي تكون مرة وحدة ما ضرش
ونصيحتي ليكم الخبز ثم الخبز هو الي هالكنا كي نحبسو الخبز تحبس معاناتنا مع كل الامراض ماشي غير مع السمنة
كيلو وهو الوزن المثالي ليا والحمد لله كامل تولهو بلي نقصت
وضرك ولى وزني 68 كيلو وراني مازال لازمني نوصلو ل 66

حتى الاستاذة تاعي سقساتني وشمن ريجيم درت وكامل عايلتي شافو بلي ولى وزني مليح وقد عمري ورجعت ثقتي بمظهري و
ووليت نلقى الحوايج الي قدي وما نحشمش كي نكون مع البنات وهكا خلاص كابوسي المرعب الي عقدني بصح مازالت عندي مشكلة صغيرة هي بروز بطني يعني الماكلة الي ناكلها كامل تروح لبطني وتتركز الشحوم تم اما باقي اعضائي عادية او اقل يعني ما عنديش ذرعين كبار ولا رجلين سمان يعني المشكلة هذي تقلقني شوية خصوصا فاللبسة تولي باشعة كي تعود كرشك خارجة
وان شاء الله نتخلص منها
راني عطيتكم تجربتي لكن ليس بالضرورة ما يتناسب معي يتناسب مع غيري كل واحد علابالو بروحو وعلابالو بمقدار ارادتو
والي فاهم ومنطقي يعرف يدير حيل لروحو باش ينقص
نتمنى تستافادو من تجربتي وتدعيولي نوصل للوزن المثالي ان شاء الله وتعاونوني بكاش وصفة تحرق الشحوم في منطقة ابطن
وجزاكم الله خيرا



©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©