عنوان الموضوع : احتياجات مطبخك من الابرة للصاروخ- تجهيزات منزلية
كاتب الموضوع : admin
مقدم من طرف منتديات ايمازيغن




طبعا كل بنوته على وش جواز بتحتار فى جهازها وتقعد تفكر جبت ايه ونسيت ايه
بتحس انها يا عينى محتاسه .. وتقعد تكتب الحاجات اللى ناقصه وتفتكر

قلت بئه نعمل الموضوع دا وان نسيت حاجه البركة فيكم يا ثيمازيغين تقولولى
فيها

نبدأ بسم الله

أطقم الحلل ::

* التيفال ... بصراحه انضف نوعين فيه تيفال زهران والتيفال التركى ,, سافلون,,
وبتشتريهم بالقطعه اى نعم سعرها عالى شويتين بس بأمانة نضيف ويستحمل ويعيش معاكى
طبعا انتى واستعمالك .. يعنى مش تغسليه بالسلك وتقولى .. الطقم باظ ومش نافع وياخسارة الفلوس فيه .. لا عايزة تغسليه سخنى بس شوية مياه وحطى بريل او فيرى زى ما تحبى وبالليفه او سكوتش برايد تغسلى هينضف معاكى ..

فى انواع تانيه زى التروفال والنوفال .. كل واحده وراحتها ..

* الاستانلس ... انضف نوعية استانلس زهران ,, بس نصيحة اذا جبتى التيفال بلاش تجيبى النوعية دى لانها غالية ممكن تتقلى الميزانيه شويتين ,, ممكن تجيبى النوعيات التانيه احسن درجة استانلس 18/10

* الصاج .. التركى بس متعمليش فيه رز ولا تغلى اللبن .. وفى انواع من الصاج مطلية تيفال .. بصراحه مش بأمن للنوعيات دى لانها مش بتكون كويسة شويتين ..

*الالومنيوم .. طبعا ناس لسه بتحب تجيبه علشان تكمل عدد بس .. وممكن متجيبهوش براحتك..



أطقم الأطباق :::

الصينى : انضف حاجه فيه اللى هو الالمانى المصرى ,فتحى محمود , اسعاره من 950 فيما فوق
وفى اسعار ب200 ناس بتجيبها علشان تحط فيه اكل .. والغالى بتخليه للنيش ..

الاركوبال : الفرنساوى ,, فيه فرنساوى رومانتيك رسمته زرقا ,, وفيه الاماراتى ..

البيركس :: الفرنساوى والاندونيسى .. منه الفاميه والعسلى ومنه الازاز المنقوش انتى وذوئك ..

الملامين :: انضف نوعية الشريف ..

وفى نوع جديد نازل السوق اركو بيركس

الكاسات بئه على حسب ما تحتاجى ,, اذا مطبخك واسع او نيشك 4 ضفله ماشاءالله ,,
بتنوعى فيها وفى اشكالها ..

الكبايات الخاصة بالمياه ,, مجات شاى ,, كبايات صغيرة ,, فنجانين قهوة ,,
واطقم الشربات منها اطقم كاسات واطقم كبايات ,, وأزايز مياه ,, وشفشأ مياه

شنطة معالق الالمانى نوعية حلوة ومعالق فردانى .. شنطة سكاكين وسكاكين فردانى ,, طقم جيلى ,, طقم جاتوه
,, طقم خشاف ,, طقم شاى,,
طقم صوانى ملامين 3 مقاسات ,, طقم صوانى استانلس ,, صينية العشا المدورة الكبيرة دى
,, صفاية معالق ,, صفاية اطباق ,, مصفى طماطم ,, مصفى للمكرونه ,, منخل
,, مقورة ,,مقصات ,, مخرطة ,, هون ,, مبشرة ,,( قطاعة شيبسى ) ,, براد استانلس ,, براد كهربا ,,
طقم صوانى فرن ,, فيه بيركس 5 و 9 قطع انتى وراحتك ..

طبعا حاجات النيش بتكون داخلة فى الحاجات دى وبتختاريها على الفرازة
البلاستيكات بأنواعها ::
جردل للزباله ( لا مؤاخذه ) ,, جردل مسح ,, التربو ,, الكمود ممكن تحطى فيه احتياجاتك تبع المطبخ او الحمام ,, وأطباق لغسل الفاكهة ,, اطباق لتقطيع الخضار وغسيلها ,, طبق لغسيل الرز ,, وادوات النضافه بئه .. مأشة خشنة للسجاد ومأشة ناعمه وجاروف وزعافة ومساحة والشرشوبة وفرشة بلاط ..



دا اللى فكراه حاليا .. فى النهاية كان الله فى عون الاهالى والله
واذا نسيت حاجه زى ما قلت فى الاول البركة فيكم يا ثيمازيغين
وربنا يتمم على كل عروسة بخير ويرزق بنات المسلمين بالأزواج الصالحين .. ويسعد كل زوجه ويرزقها الذرية الصالحة
اللهم امييييييييييييييييييييييي ن



واذا افتكرت حاجه تانى هاجى ارغى واكتبها ,,
سلام يا حبايب فى أمان الله



قد تكوني مهتمة بالمواضيع التالية ايضاً:





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©