عنوان الموضوع : هنطلق الدنيا هنطلقها وبالتلاته- في الدين الاسلامي
كاتب الموضوع : amira
مقدم من طرف منتديات ايمازيغن





ازيكم يا ثيمازيغين عاملين ايه ؟
يارب تكونوا بخير وبألف صحه وعافيه يارب




ندخل فى موضوعنا بقا
طبعا كلكوا مستغربين من العنوان

هنطلق ايه ؟!وكمان بالتلاته ؟!
ايوة يا بنات

هنطلقها ونحب واحده تانيه ونرتبط بيها وهنجهز ليها المهر
والمؤخر بتاعها هيكون غالى اوى اوى اى !!

ايه ده ؟!
انتى بتقولى الغاز ولا ايه ؟!
لا يا بنات ولا الغاز ولا حاجه
يا بنات احنا هنطلق الدنيا وبالتلاته كمان عشان مش توحشنا او نحبها ونرجع ليها تانى !!
لا هانقولها مع السلام يا دنيا
انتى طالق .. طالق .. طالق!!
وهنروح نحب الآخرة وهنجهز ليها المهر .
ولا ايه ؟!
مش لازم نعمل اللى علينا ونتعب فى الدنيا بس علشان ننعم فى الجنه خالدين

طبعا يا بنات كلنا بنحب الجنه
كلنا نفسنا ندخلها
بس مش بنجهز ليها المهر !!
مش بنصلى مش بنلتزم بأوامر الدين بتاعنا .. وعاوزين الجنه وكأنها خلقت لينا !!
طيب ليه ؟!

مستعظمه انك تقومى تصلى بالكتير اوى هتاخد منك 10 دقايق
مستعظمه انك ماتشتميش
مستعظمه انك ماتسمعيش اغانى ولا تحفظيها !!

مستعظمه انك تسمعى او تحفظى قرآن !! بس فى الاغانى .. من اول مرة تثبت وتتحفظ صم !!

ولا ايه يا بنات
كلمونى ناقشونى
لازم نفوق
لازم نلاقى حل للمهزلة اللى احنا فيها دى !!

عيب بقا
عيب اوى
نكون احنا مسلمين بالاسم بس
لازم نكون مسلمين بجد
مش اسم !! مش لقب !!
عارفين ان الكورة اللى بتبقا ورا الدماغ فى الطرحه دى حرام .. واللى بتعملها صعب اوى انها تدخل الجنه او تشم ريحتها

ومع ذلك اغلبنا بيعملها .. وقال ايه .. شياكه
يا سلام يا سلام !!
عارفين ان اللبس الضيق والقصه اللى باينه وكلانا مع الولد والضحكه العاليه المايصه حرام وعيب !!

ومع ذلك بنموت فيها ..
نفرح اوى لما نلبس ضيق ويتقال علينا بنات جميله !!

ماكنتش عاوزة اقول /مزة/ علشان عيب وانا بكره الكلمة دى جدا
نعم يا ساده .. انها الأمة الاسلاميه !!
لا ماينفعش اقول الاسلاميه .. مايهونش علينا

الأمه المسلمة بالاسم بس
بنشتم بنلبس ضيق !! مابنصليش .. حاطين مونيكير !!
راسنا عامله زى ماتكونى واخده المخده ورا دماغك
لا ولازم القصه تبان عشان ابين ان عندى شعر وحلو كمان !!

ههههه بتفرطى فى نفسك !! بتخليكى رخيصه اوى وسهله اوى
اى حد يشوف جمالك !!
انتى مش مقدرة نفسك
اعقليها بس وفكرى مع نفسك
وصدقينى الدنيا دى ولا ليها اى لازمه غير انها الوقت اللى بنحوش فيه المهر للآخره

راجعى نفسك
ارجوكى احنا الجيل الجاى اللى هيبنى مصر
واحنا الجيل اللى هيبنى الأمة الاسلاميه ان شاء الله
هنرجع زى زمان
بس لازم نفوق ونتبنى صح
ارجوكم ..

كده انا خلصت موضوعى
كنت عاوزة اكمل بس ده تلخيص الكلام واللى كنت هاقوله زى اللى انا كاتباه برضو

الباقى عليكوا انتوا
راجعى نفسك ... دورى عليها .. وطلقى الدنيا بالتلاته وروحى حبى الآخره
وحوشى المهر ..
وارتبطى بالاخره وحبيها واوعى تكرهيها او تخافى من الموت
لأن انتى كده كده هتموتى فا لازم نعمل اللى علينا ونحوش مهر كويس جدا علشان الآخره ترضى بينا
وخلى بالك .. المؤخر ثمنه غالى اوى اوى اوى

لو حبيتى الآخره وقررتى ترتبطى بيها وبعدين الشيطان لعب بيكى تانى وحبيتى تبعدى عنها !!

التمن هو هتتمنعى من الجنه

ويارب احفظنا يارب .. ( النار)
ومش هينفع ترجعى فى قرارك ساعتها وتقولى خلاص رجعونى الدنيا وانا هحبها ..
لا خلاص ... القطر عدى ومش هيرجع .. القطر فاتك خلاص ..

بس دلوقتى احنا فى الدنيا وعايشين بسلامه الحمد لله .. يبقا تعملى لآخرتك وتطلقى الدنيا زى ما قولتلك
اتمنى يكون موضوعى مفيد .. ومعلش اذا طولت


قد تكوني مهتمة بالمواضيع التالية ايضاً:





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©