عنوان الموضوع : السواك : مطهر للفم ومرضاة للرب
كاتب الموضوع : salima
مقدم من طرف منتديات ايمازيغن



سنُكمل ان شاء الله بقية حلقات دعوة للتفقه فى الدين الاسلامى

وقد تحدثنا سابقاً عن الوضوء و حكم من آكل بالأوانى الفضيه والذهبيه و قضاء الحاجة وآدابها .



السواك

يعني ايه سواك :


يعني نستخدم عود أو ما يشبهه في تنظيف الاسنان او اللثه عشان نشيل ما يعلق بهما من طعام أو روائح

إيه حكم السواك في الاسلام :


السواك سنه عن الرسول صلى الله عليه وسلم وبيكون في كل الاوقات .. حتى لو كنا صايمين

لأن النبي صلى الله عليه وسلم رغّب في استخدامه على الدوام .. ترغيب مطلق يعني .. وماقيدش استخدامه بوقت معين ..

قال صلى الله عليه وسلم " السواك مطهرة للفم مرضاة للرب "

وقال ايضا "لولا ان أشق على امتي لأمرتهم بالسواك عند كل صلاة "



طيب إيه يا ترى الوقت المناسب اللى نستخدم فيه السواك :


- لما نتوضأ ،سواء قبل الوضوء او بعده

- لما نصحى من النوم

- لما ريحة فمنا تتغير

- لما نقرأ القرآن

- لما نصلي

- لما ندخل المسجد

- ولما ندخل البيت برضه ...
لما سئلت عائشه بأي شئ يبدأ النبي صلى الله عليه وسلم اذا دخل بيته .. قالت "بالسواك "

- وعند طول السكون وصفرة الاسنان

- وكمان رسولنا صلى الله عليه وسلم كان لما يقوم من الليل كان بيدلك فاهـ بالسواك

واكيد احنا عارفين ان احنا لما نيجي نعمل عباده او حاجه تقربنا من ربنا بنكون مأمورين اننا نكون على احسن حال من النظافه والطهاره



طب فيه مشكله لو استخدمت الفرشه والمعجون بدل السواك ؟


لأ مفيش مشكله لانها هتؤدي لنفس الغرض وهو تنظيف الاسنان

بل ساعات بتكون انسب لو حد عنده مشكله في اسنانه ومش هيقدر يستخدم السواك ومحتاج حاجه لينه خالص زي الفرشه


لكن برضه لازم نعرف ان استخدام السواك "عود الارآك " فيه فوائد طبيه كتيره ..

وكمان هو موافق لسنة نبينا صلى الله عليه و سلم ..

وكمان السواك حاجه عمليه اكتر في جيبك عالطول وسهلة الاستخدام مش فرشه ومعجون وحكايه ..



هستفاد إيه لما استخدم السواك :


اهم حاجه هنستفادها هي اللي في الحديث اللي فوق
انه مطهر للفم ومرضاة للرب

ومننساش ان دي سنه .. يعني ثواب وفوائد تانيه كتيره .



*وهنا لازم نقول ان بعضنا بيعدي عليه الشهر والشهرين من غير ما يتسوك .. لإما هو مكسل او ميعرفش الموضوع من الاساس والناس دول فاتهم الاجر الكبير اللي في السواك

ليه ؟.. لأنهم سابوا سنه النبي صلى الله عليه و سلم كان بيحبها وبيحافظ عليها ...
ده كمان كان عاوز يأمرنا بيها أمر ايجاب لولا إنه خاف علينا من المشقه " ...لولا ان اشق على أمتي"

ده غيرإن في فوائد تانيه كتيره للسواك زي :


- يقوي الاسنان

- يشد اللثه

- ينشط العبد



نعمة الاسنان !

ايوه ..نعمة الاسنان ... السِنه اللي ربنا اديهالك دي لا تقدر بثمن ..عشان كده في طب الاسنان بيركزوا اكثر على الترميم
لانهم ميعرفوش يعملولك سنه زي اللي ربنا عطيهالك ابدا..
من اعصاب وامدادات دمويه وغيرها..

اعجااز الهي في الخلق



عشان كده لازم نعرف ثقافة الحفاظ على الاسنان
مثلا نروح لدكتور نعرف منه ازاي بطريقة صحيه ننظف الاسنان ونحافظ عليها .. ونعلم اطفالنا هما كمان يحافظو عليها


والسواك هو ده الاجراء اللي الاسلام عملهولنا عشان نحافظ على نعمة ربنا



عرفت بقى أد إيه نعم ربنا عليك ؟





ويتلخص الدرس بالأسئله الآتيه ::

1 - ماهي الأوقات المناسبة لإستخدام السواك ؟

 2 - ماهي فوائد إستخدام السواك ؟





قد تكوني مهتمة بالمواضيع التالية ايضاً:





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©