عنوان الموضوع : وصفة جديدة للبسباس من اختراعي - من مطبخي
كاتب الموضوع : mira
مقدم من طرف منتديات ايمازيغن

السلام عليكم خواتاتي انا عضوة جديدة وحابة نشارك معاكم انا انحب بزاف الطبخ وانحب نتعلم وعلاببها ندخل للكوزينة ونخترع اطباق من راسي
هاد الطبق تاع البسباس اخترعتو من شهر هكداك وخرج هااايل كامل عجبهم ان شاء الله انتوما تاني اتجربوه ويعجبكم
نبدا بسم بالله بالمقادير
كيلو بسباس
راس ثوم
كيلو بطاطا
250 غ لحم مرحي
7 حبات بيض
شوية معدنوس
شوية ارز

زيت للقلي
ملح فلفل اسود راس الحانوت







التحضير

انرابي الثوم وانديرو يتجمر ف شوية زيت وانديرلو التوابل اللي ذكرناها

اومبعد انديرو عليه البسباس بعدكا نكونو قطعناه بالطول وانخلوه يتجمر مع الثوم امليح حتى يدبال

وبعدما يتجمر نمرقوه بشوية ماء
تحكمي اللحم المرحي اتدوزنيه بالملح والفلفل الاسود وشوية ثوم رابي وحبة بيض وشوية ارز

وتشكلي كويرات صغار


وكي يغلي المرق اللي فيه البسباس ترميه يطيب معاه.


بعدها تحكمي البطاطا تقطعيها دوائر او بالطول كيما اتحبي وتقليها وتحطيها تقطر


كي يطيب البسباس واللحم انحيو اللحم من القدر وانحيو تاني البسباس بغراف متقوب


نحكمو بلا تاع الفور نحطو فيه البطاطا المقلية وفوقها البسباس

وفوقها انحطو كويرات اللحم المرحي

اومبعد نحكمو المرقة ديالنا نديرولها البيض والمعدنوس

ونفرغوها ف البلا تاعنا

وانحطوها ف الفور حتى يطيب البيض وتقدم ساخنة






ان شاء الله الوصفة عجبتكم نتمى منكم ردود خواتاتي متنساونيش من دعواتكم وشهية طيبة



©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©