عنوان الموضوع : vermicelle على الطريقة الجزائرية - طبق جزائري
كاتب الموضوع : chahinez
مقدم من طرف منتديات ايمازيغن

السلام عليكم
هادا طبق مغربي الاصل يقولولو شعيرية مدفونة .... في المغرب يديروه حتى بـ les abats و اللحم ....
هادي فرسيو الجيريان تختلف شوية ولكم الاختيار طبعا ...

المقادير :
قطع من الدجاج - 1بصلة رابي 2 سنات ثوم - زيت - ملح وفلفل اسود وقرفة عود او شوية غبرة - كمشة حمص مشمخ و طايب نص طياب - 500 غ فارميسال اي علبة واحدة - 1 م ك زبدة - و 4 بيضات مغليين .
التحضير : تحطي الزيت في الكوكوت + البصل والثوم و تزيدي قطع الدجاج ... تحطي التوابل و تحركي ونتي تقلي فيهم .....
فرغي لتر نتاع ماء ولا كنتي دوبليتي كمية الفارميسال راكي تزيدي الماء طبعا .... مع لي نعرفو انها ما تزكاش كيما الكسكس .....هادي المقادير نتاع عايلة صغيرة .
اغلقي الكوكوت ونص طياب حلي وزيدي الحمص وعاودي اغلقي ...
في الوقت هادا تكوني بليتي الفارميسال نتاعك في القصعة بشوية زيت ... مقدار كاس نتاع تاي باش ما تلصقش و تتعجن في بعضاها ...
ديريها تفور الخطرة الاولى ... نحيها وحطيها تحت العين وخليها تشبع ماء ...و خليها تقطر شوية 5 د على الاقل و عاودي ديريها تفور ....عاودي فوري وبلي بالماء ثلاث مرات ..... حطيها في القصعة وادهنيها بشوية زبدة 2 م ك خليها بجهة ...
او ماديريلها والو و حطي هادوك 2 م ك في المرقة كيما ندير انا عندك خيارين ...تكون المرقة و الدجاج طابو ...
حطي في مقلة طرف الزبدة و حمري هادوك اطراف الدجاج .... و هاديك المرقة لا شفتيها بزاف خودي النصف نتاعها وجمري فيه هاديك الفارميسال ... نفس طريقة الشخشوخة نتاع الظفر ....... و ادا كانت ناقصة شوية حطيها كامل ... وعينك ميزانك ...







لاشفتيها خاصها راكي تزيدي تسقيها .... نورمال .... سربي الفارميسال و شبحيه بالبيض و الدجاج محمر .... ولا تبغي القرفة زيني بها من فوق ..... طبق خفيف و لديد صدقوني ... اما المغاربة في طريقتهم يفتو الدجاج ويحطو طبقة من الفارميسال و طبقة الدجاج المفتت و فوقو طبقة اخرى من الفارميسال و يساووها على شكل هرم و يزينوها حتى هما بالبيض و خطوط القرفة و سكر ناعم وحتى اللبن والايب .... يم يم يمييييييييييييييي.
ان شاء الله تكون عجبتكم الوصفة و في الحقيقة ماهيش حاجة جديدة .... وتجربوها انشاء الله بالطريقة لي تفضلوها ...
سلامي الحار ليكم ...
دعوة خير بزاف عليا .... ومن القلب .....هههههههههههههههه



©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©