عنوان الموضوع : غراتان لوبيا خضراء بكريات اللحم مممممم - من مطبخ الجزائرية
كاتب الموضوع : khouloud
مقدم من طرف منتديات ايمازيغن

السلام عليكم و رحمة الله .........انا عضوة جديدة هل من مرحب ؟
قبل ما نبدا بالمشاركة الأولى تاعي نقوللكم صح رمضانكم و ينعاد علينا وعليكم بالخير و البركة
ما نطولش عليكم ........نبداو على بركة الله
ملاحظة : انا خاطيني طياب و هذا وين بديت ندخل روحي في الكوزينة لأنني كنت نقرى ومكانش عندي الوقت , مالا ان شاء الله تعجبكم الوصفة تاع اليوم

المقادير :
200 غ لوبيا خضراء
2 حبات متوسطة جزر (مقطعة دوائر)
حبة متوسطة بصل
2 حبات ثوم
حبة طماطم
3 حبات بطاطا
لحم مرحي (نكونو وجدناه على شكل كريات )
زيت وسمن
التوابل : ملح , فلفل اسود , فلفل احمر , كمون , راس الحانوت , زعفران , قصبر حب , قرفة .
2 حبات بيض
2 ملاعق كبيرة كريمة طازجة
50 غ فطر

بسم الله :
انا نحب كي نطيب نخلط بين السمن والزيت , لذلك نحطو كمية من السمن وشوية زيت و نحطو البصل و الثوم ثم الطماطم مقطعة ثم اللوبيا و الجزر, من بعد نتبلوها بالتوابل الكل نغطوها بالماء و نخلوها طيب حتىتخثر ( مرقة عادي وانا راني قاعدة نشعر عليكم هههههههه) من بعد نزيدو كريات اللحم حتى طيب
كي طيب نحطو المرقة تاعنا في صينيية غراتان (و تكون خاااااثرة مممممممم) و نحط معاها البطاطا لي نكون قطعتها مكعبات وقليتها ,و نرش من فوق حبات الفطر , من بعد نجيب هادوك زوج حبات بيض نخلطهم مع الكريمة الطازجة و قرصة ملح و نفرغ الخليط من فوق ......و نحطها في الفرن حتى تأخذ اللون الذهبي الذي ارهق الملايييين هههههههه
تحبو ديرولها الجبن المبشور ديرو ....انا مدرتلهاش لخاطرش الكريمة الطازجة قامت بالواجب و مدت ذوق روعععععة .

ان شاء الله تعجبكم .....و ان شاء الله مكنتش ثقيلة عليكم ...هاذي اول مشاركة لي و راني كل ما نطيب حاجة للدار نحس درت انجاز هههههههههههههه
صح فطوركم كاااااملين بالحاضر بالغايب .....و السلام عليكم

و اسمحولي حاولت وحاولت لكن معرفتش نطلع صورة .....ارجو منكم تورولي كيفاش



©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©