عنوان الموضوع : فراح بانية - وصفة من مطبخي
كاتب الموضوع : chichaki
مقدم من طرف منتديات ايمازيغن
مساء الفل والورد والياسمين علي حبيايب قلبي الثيمازيغين
طريقة الفراخ البانية بالطريقة بتاعتى
فقولت اعمل موضوع مخصوص للفراخ
الطريقة يا بنات سهلة اوي وتنفع لو حد مستعجل وعايز طعم جميل كمان وشكل حلو
وكمان هتتبل منغير بصل وهتتعمل منغير بيض وهتطلع جميلة اوي
ماعلينا بدل ما انا عمالة اقول فوازير والغاز ابدا بالمقادير والطريقة علي طول
بسم الله نبدأ
المقادير
نص كيلو صدور فراخ مخلية
دقيق
بقسماط
توابل عبارة عن
ملح فلفل قرفة شطة كمون كسبرة ناشفة
جنزبيل بودر قرنفل بودر ثوم بودر واي توابل تحبيها
الطريقة
اول حاجة يا بنات هنجهز تتبيلة الفراخ في منتهي البساطة
هنجيب شوية مية متبلة بكل التوابل اللي قولت عليها
وهنجيب الصدور المخلية والمتقطعة سلايسز ونحطها في التتبيلة ونسيبها شوية حوالي نص ساعة
وممكن اقل كمان لو انت مستعجلة
وفي الوقت اللي بتتبل فيه هنجهز الدقيق والبقسماط
هنجيب شوية دقيق ونتبلهم بملح وفلفل واي توابل تحبيها
وهنجيب البقسماط وعليه شوية دقيق ونتبلهم برضه بملح وفلفل وشطة وثوم بودر وجنزبيل وقرفة واي توابل تحبيها برضه
هنجيب الفراخ بعد ما اتبلت
وناخد قطعة منها ونحطها في التتبيلة ونبلها كويس
وبعدين ناخد حتة الفرخة وعلي الدقيق ونقلبها علي الجنبين كويس
نرجع تاني نحط حتة الفرخة في المية بتاعة التتبيلة
واخر خطوة هناخد حتة الفرخة ونحطها في البقسماط والدقيق المتبلين
ونقلبها علي الجنبين ونضغط عليها بايدنا كويس
وممكن ما تحتاجيش تحطيها في التلاجة عشان تتماسك
لانك وانت بتعمليها في البقسماط بتضغطي عليها كويس بتمسك وبتبقي مظبوطة
ونكرر نفس الخطوات لحد ما نخلص كل الكمية بتاعة الفراخ
وفي زيت غزير وسخن نحط الفراخ تتحمر
ونقلبها علي كل ناحية لحد ما تاخد اللون الدهبي الجميل
ونطلعها علي ورق مطبخ عشان يتشرب الزيت الزيادة
ودة الشكل النهائي للفراخ
طعم وشكل روعة يا بنات
انا عملت جنبها مكرونة بالصلصة وبطاطس محمرة ومخلل
بكدة اكون خلصت ويارب الطريقة تعجبكوا
ومستنية اسمع رأيكم
وياربت التقييم يا بنات
ودعوة حلوة منكوا يا احلي بنات
قد تكوني مهتمة بالمواضيع التالية ايضاً:
المصدر: منتديات ايمازيغن
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©