قصة اخي العاصي مع الخدمة الوطنية اعلان مسابقة

[مريم]

عنوان الموضوع : قصة اخي العاصي مع الخدمة الوطنية اعلان مسابقة
كاتب الموضوع : مريم
مقدم من طرف منتديات ايمازيغن

كان كيما اغلبمكم مبغاش يمشي يستنا فالاعفاء ووووو وولى عاصي ورسلولو شحال من مرة ومبغاش و كان يقولو لصحابو والله منمشي حتى يرفدوني هما نعم وهذا حدث كي سماطتلو وشاف روحو كبر ولا خدمة لا زدمة عرف بلي راه "يحشي لروحو مش للدولة " مشى عند لي جوندارم قالولو منقدروش نهزوك منا انت روشارش ولازم نحكموك في باراج ولا نهزوك من دار المهم سمح فيهم وقعد هكذك وكي ولى فعمرو 28 جات الديودا تع جوندارم للدار ومن زهرو خرجلهم هو بسك مادرش بلي راهم جاين على جالو وبالزيادة كان وحد فالدار امالا خسرو عليه زوج كلمات انت فلان رانا نحوسو عليك كيما يقولو فالعسكر من الحركة حول للديودا بلا مايدي حتى صوالحو من بعد لحقناهملو بات عندهم ليلة و داوه كي المحابسي للترونزيت تع وهران ريح سمنتين تممرد فيها ومن تما داوه للثكنة الخاصة بالعصاه المويلح ايمازيغن والي ميعرفها ش يسقسي عليها و غادي يدهش
المهم ريح شهرين كان مرة عيطلنا وحسينا بلي لافوا تاعو انورمال وزاد عيدلنا واحد طبيب من الكزرنا قالنا رواح ديو ولدكوم بابا زعف وحسب بلي طلقوه وخاف يجي وحدو زعف وقال والله منمشيلو يتخذ في تلك اليلة شافت امي منام عليه بلي مهبول ومريض من عقلو وهذاك الي صرالو والله كيما نحكيلكم تهالوا في امهاتكم راهم غي هوما الي يحسو بيكم مام رانا مقصرين بزاف تجاهم
مشا بابا وخويا لكبير للجلفة ووصلو قدام الكزرنة وراح بابا يسقسي فبويت بوليس فقالولو هذا طلقناه البارح مهوش عندنا و البورتابل تاعو كانو سرقوه فتلك الحظات كان خويا لكبير قاعد قدام اللوطو ايا شاف وحد مهبول مقطع جاي لعندو وقالو نتا خويا فلان يعني المريض لي فالعسكر عرف الصحيح والصحيح معرفوش و خويا طبعا مامنوش حسبو طلاب وبدا زعما غي يقصر معاه ويسقسي فيه اسم باباك يماك لوطودي تعمن والمريض يجاوب اسئلة صحيحة تما عرف الصحيح بلي صح هذا خويا لي مشا العسكر
بصح ياخوتي لومان تشوف كيش مشا وكيش ولا ولى صفر فوجهو وضعاف بلبزاف حتى مبقى فيه والو والله متعرفو المهم اختصارا ولاو روحو وفالطريق بدات التصرفات الغريبة سباب وشتم وباغي يفتح الباب و يقفز واللوطو تمشي الخ
لحقو للدار السيد ميعرف حتا وحد من غير بابا يما وخويا لكبير لخرين قاع نساهم و غي طياحة والسباب و اومر عسكرية ويكسر اي حاجة قدامو ويبزق فوجه الاشخاص ,,,,, ديناه عند طبيب تاع لينار زاد هبلو ديناه عند اشهر الرقاة قالو مفيه والو درنا بيه جميع الطبة بلا نتيجةشهر ونص وهو على هذ الحالة ومن بعد صحاب بابا قالولو دخلو سبيطار تع المهابل وقنعوه بلي تما يبرا يما مبغتش بسك عرفت بلي تما يزيدو يهبلو ه وهو كاين يطيح لكلام حتى ليما وبابا ويقولها نت مش يما
دخلناه سبيطار المهابل وحوسنالو عرف باه يتهالا فيه ريح شهر تما نهار فاق قالنا انا وش راني ندير هنا علاه جبتوني حسبيني مهبول بهذ الكلمة بكيتهوم دموع وتما قالو بابا ايه يا ولدي لوكان تعرف كيفاش كنت متقول هذ لكلام باختصار خرج وتبع ترتم تع دوا واليوم الحمد لله راح مليح بصح احداث القصة تع باه مرض لليوم معرفناهاش كل الي عرفناه انو رد لخاطرو وحقروه لانو انسومي وصراتلو عقدة نفسية حتى وصل ضرب كومندو
القصة هاذي فجوان 2015
انا منيش نخوف فيكم مي لوكان سقم كواغطو من لول ميسرالو هكا يرفدوك مذلول و يعاملوك بحقارة تقول مروكي مش جزايري ولا اقصد تهكما بالمغاربة وفالتالي تفقد اعظم نعمة نعمة العقل
ملاحظة كي مشينا للجلفة الحمد لله انو كان باقي قدام الكزرنا مريح وكيما قلت هو الي غقلنا مش حنا يعني لوكان ناض وبعد شوية نفوتو عليه ومنديوهاش فيها ولوكان راه لليوم يجوب شوارع ايمازيغن والحمد لله على كل حال
وسقسينا على التعويض قالونا مستحيل يعوضو مرض عقلي حتا الكونتراكتيال كي يخرجو بسيكاتري يخرج صحرا وزيد انسومي يفقد بزاف حقوقو
القصة للعبرة لا للترهيب كل واحد وشخصيتو على بيها راني نركز عليكم ونقولو سقمو وضعيتكم باي طريقة المهم متكونش انسومي
والسلام



©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©